Sergio Ramos në Paris Saint-Germain nuk ka një të ardhme të sigurt. Kontrata që e mban të lidhur mbrojtësin spanjoll me kampionët e francës skadon në fundin e këtij sezoni.
Momentalisht gjithçka është pezull për sa i përket rinovimit të 37-vjeçari me PSG. Sipas asaj që raporton francezja “L’Équipe”, një pistë për të ardhmen e ish-kapitenit të Real Madrid, është në Arabinë Saudite.
Al-Hilal dëshiron të ketë në skuadër Sergio Ramos duke i ofruar atij një rrogë marramendëse prej 30 milionë euro në sezon. Në rast të një transferimi në skuadrën saudite, mbrojtësi do të ketë përballë ish-shokun e tij të ekipit Cristiano Ronaldon.
Ky sezon me fanellën e Paris Saint-Germain nuk ka qenë aq shumë i zhurmshëm nga Sergio Ramos. Mbi të gjitha, ai nuk mori një ftesë nga kombëtarja e Spanjës për Katar 2022.
