Konventa e LSI/ Meta do të mbajë fjalimin kryesor, pritet ndryshimi i emrit të partisë

Në pallatin e Kongreseve do të mbahet Konventa e LSI-së, ku pritet që të jetë i pranishëm dhe vetë presidenti Ilir Meta.

Ish-presidenti do të mbajë fjalën kryesore në këtë Konventë, ku do të prezantohen edhe ndryshimet statutore të LSI-së, mes të cilave pritet të jetë dhe ai për ndryshimin e emrit të LSI.

Pas kësaj konvente do të ketë zgjedhje të kësaj force, në forumet e saj, në secilin qark, në të gjitha degët, e kësaj force politike që do ketë nje emër të ri.

Pritet që emri do të bëhet publik në fjalën që do të mbajë  Meta. Kryemadhi ka mbërritur në Pallatin e Kongreseve duke u përshëndetur me simpatizantë të kësaj force politike, por nuk pritet që të mbajë fjalim në konventën e sotme.

Gjatë paradites së sotme, ish-presidenti Meta mbërriti në selinë e LSI-së, ku rimori edhe teserën e Partisë.

“Erdha këtu se më kish marrë malli për këtë dokumentin e LSI-së. Jam krenar që në 2004-n themelova këtë parti për integrimin, që sot bllokohet nga Partia Socialiste. LSI ka bërë çdo gjë për të përshpejtuar negociatat”, tha ai.

Për bllokim të integrimit nuk akuzoi vetëm Edi Ramën, por edhe Lulzim Bashën, që e cilësoi shtojcë të Kryeministrit. LSI, tha Meta, ra viktimë në kurthin Rama-Basha.

“Në mënyrë të qëllimtë programuan djegien e mandateve, shkatërrimin e reformës në drejtësi për të kapur shtetin në këto përmasa. LSI-në e futën në grackë, që doli jashtë funksionit të saj duke u bërë një shtojcë e pavetëdijshme e një shtojce tërësisht të vetëdijshme të regjimit kleptokratik të Edi Ramës, që ishte PD e Lulzim Bashës”, tha ai.

Aksioni i parë i rikthimit në politikën aktive do të jetë referendumi.

“Referendumi, që i ka munguar popullit të Shqipërisë që nga 1998, referendumi do të jetë shpata e Demokleut për të gjithë kleptokratët, uzurpatorët dhe tradhtarët dhe që i ngulin thika pas shpine shtetësisë së Kosovës dhe interesave të shqiptarëve kudo që ata janë”, u shpreh ai.

Meta deklaroi se rimarrja e drejtimit të LSI-së nuk është qëllim në vetvete.

“Nuk jam këtu për të marrë drejtimin e LSI-së sepse këtë e lashë para pesë vitesh. Jam këtu për të sjellë mesazhin e popullit të 2 marsit dhe për t’u bashkuar së bashku në triumfin e mesazhit të 2 marsit”, u shpreh ish-Presidenti.

Referendumi duket se do të jetë kauza e Ilir Metës, ndërsa Berisha ka njoftuar sezon protestash nga shtatori. Por, a do të përputhen dy agjendat e opozitës?

“Do të bashkëpunojmë me çdo shqiptar të ndershëm, patriot dhe demokrat të ndershëm, pas asnjë diskutim. Nuk jam në garë as me Berishën dhe skam qenë në garë as me Lulushin. Shqipërinë e ndryshon vetëm referendumi. Është primare e primareve. Refrendumi tani është vetë Shqipëria, pasi është vënë në pyetje ekzistenca dhe e ardhmja e vendit”, tha Meta.