Konventa zgjedhore e LSI-së për Tiranën, Luan Rama: Sfida jonë e vetme janë hallet e qytetarëve!

Gjatë ditës së sotme, Lëvizja Socialiste për Integrim zhvilloi konventën zgjedhore për degën e njësisë administrative numër 7 në Bashkinë e Tiranës.

Zgjedhjet e brendshme të LSI-së për qarkun e Tiranës, ishin arsyeja e mbledhjes në këtë konventë.

Sipas nënkryetarit Luan Rama, LSI dallon nga forcat e tjera politike për shkak se solidarizohet me qytetarët.

 “Lëvizja Socialiste për Integrim ka një vlerë që nuk e kanë forcat e tjera politike dhe që kjo është më e spikatur dhe që ka të bëj me solidaritetin. Ne jemi një forcë e solidaritetit. Ne jemi forcë politike që ju gjendemi dhe jemi pranë njerëzve. Sfida jonë e vetme janë hallet, shqetësimet dhe interesat e qytetarëve. Me siguri e kemi dëgjuar fjalimin që mbajti Presidenti i ri SHBA-ve dhe ajo që çfarë bënte përshtypje ishte solidariteti. Ne kemi vlerë dhe duhet të demonstrojmë të gjithë fuqinë tonë në solidaritetin, në humanizmin dhe në bashkëveprimin me të gjithë qytetarët. Të parët janë qytetarët dhe LSI-ja është forca për t’i shërbyer qytetarëve.”, tha nënkryetari.

Ndërkohë, Sekretari i Përgjithshëm i LSI-së, Endrit Braimllari sqaroi se deri më tani është mbyllur faza e parë e organizimit të zgjedhjeve, jo vetëm në njësinë shtatë por në të gjithë kryeqytetin.

Nga këto zgjedhje do të dalë kryetari ose kryetarja e re e Tiranës dhe komiteti drejtues i LSI-së për të gjithë Tiranën. (D.D/Shuplaka)