Policia e Korçës ka vendosur në pranga tregtarin 39-vjeçar i cili së bashku me 4 veterinerë matrikuluan 120 bagëti (gjedhë dhe bagëti të imta) të kontrabanduara nga Greqia.
4 veterinerët u arrestuan më 23-korrik, ndërsa 39-vjeçari ishte shpallur në kërkim.
Të arrestuar për shpërdorim të detyrës janë veterinerët Baki Myrtollari, 64 vjeç, banues në Durrës, Kujtim Agolli, 57 vjeç, banues në Korçë, Demir Koritari, 64 vjeç, banues në Maliq, punonjës të Autoritetit Kombëtar Veterinar dhe Mbrojtjes së Bimëve, dega Devoll.
Gjithashtu edhe Ergys Lame, 39 vjeç, banues në Devoll, punonjës (veteriner) i Autoritetit Kombëtar Veterinar dhe Mbrojtjes së Bimëve, dega Devoll, që do ketë edhe akuzën e ushtrimit të ndikimit të paligjshëm.
Njoftimi i policisë:
Specialistët për Hetimin e Krimeve Ekonomike dhe Financiare, në vijim të punës për lokalizimin dhe kapjen e shtetasve të shpallur në kërkim, bazuar dhe në informacionet e siguruara në rrugë operative, kapën dhe ndaluan shtetasin:
G. M., 39 vjeç, banues në Bilisht, pasi Prokuroria e Korçës ka nxjerrë urdhër ndalimi për të, për veprat penale “Kontrabanda me mallra të tjera”, “Tregtimi apo transportimi i mallrave kontrabandë” dhe “Fshehja e të ardhurave”.
Ky shtetas dyshohet se ka kontrabanduar nga Greqia, 100 bagëti të imëta dhe 20 gjedhë. Më pas, dyshohet se në bashkëpunim me 4 veterinerë (të arrestuar gjatë operacionit “Matrikulli”, i zhvilluar më datë 23.07.2025), kanë matrikulluar bagëtitë dhe gjedhët, me matrikullat që kanë marrë nga zyra e veterinarisë në Devoll.
Materialet procedurale i kaluan Prokurorisë, për veprime të mëtejshme.
