Në kuadër të masave të marra në mbrojtje të koronavirusit edhe në Kosovë janë anuluar disa fluturime që lidhin këtë vend me Italinë Veriore.
Kujtojmë se Italia Veriore, pra rajoni i Lombardisë është rajoni më i prekur nga koronavirusi ku shumë shtete përfshirë edhe Shqipërinë kanë marrë masa me fluturimet drejt këtij rajoni.
Vetë shteti Italian e ka në qendër të vëmendjes këtë rajon si ndër më të prekurit dhe ka bërë thirrje që të evitohen sa më shumë lëvizjet.
Kosova ka vendosur të anulojë të gjitha fluturimet që vijnë nga zonat e prekura nga koronavirusi në Itali.
Ministri i Infrastrukturës, Lumir Abdixhiku, ka bërë të ditur se këtë rekomandim emergjent e kanë marrë nga Instituti Kombëtar i Shëndetësisë, si refleksion i karantinës së vendosur nga qeveria italiane për Italinë veriore.
“Sot, në ora 12:40 kemi pranuar rekomandim emergjent nga Instituti Kombëtar i Shëndetësisë për anulimin e të gjitha fluturimeve që vijnë nga zonat epidemike të Italisë së Veriut – si reflekcion i karantinës së vendosur nga qeveria italiane në betejën kundër Coronavirusit.
Si rrjedhojë, kam kërkuar anulimin e përkohshëm të të gjitha fluturimeve që vijnë nga kjo zonë epidemike e cilësuar si zonë me risk të lartë.
Fluturimet janë ndërprerë. Ndjejmë keqardhje për masat e marra – por në situatën e tanishme nuk kemi alternativë. Jam në kontakt të ngushtë me Ministrin e Shëndetësisë Vitia dhe me Ministrin e Punëve të Jashtme Konjufca për të koordinuar kontrollin ne Aeroport dhe asistencën eventuale ndaj udhëtarëve në zonat e rrezikshmërisë së lartë”, ka shkruar në Facebook Abdixhiku.
