Qeveria e Kosovës ka refuzuar kërkesën e Presidentit serb Tomislav Nikoliq për të vizituar shtetin më të ri të Europës, me rastin e Krishtlindjeve ortodokse të premten.
Lajmi u bë i ditur nga Ministria e Punëve të jashtme të Kosovës, e cila sqaron se ky vendim është marrë pasi sjelljet e fundit të Serbisë janë kundër frymës së bashkëpunimit midis shteteve, duke nënkuptuar arrestimin e Ramush Haradinajt.
Njoftimi i plotë:
“Qeveria e Kosovës ka marrë vendim për të refuzuar kërkesën e Presidentit të Serbisë, Tomislav Nikoliq dhe zyrtarëve të tjerë të lartë të Qeverisë së Serbisë për ta vizituar nesër komunën e Shtërpcës në Kosovë.
Refuzimi vjen pas vonesës për të deponuar me kohë kërkesën për vizitë në Kosovë ashtu siç parashihet me marrëveshjen për lejimin e vizitave të zyrtarëve të lartë ndërmjet dy shteteve.
Qeveria e Kosovës konsideron se sjelljet e fundit të Serbisë dhe deklaratat e njëpasnjëshme janë kundër frymës së bashkëpunimit ndërshtetëror dhe të arriturave të dialogut për të ndërtuar ura të shëndosha bashkëpunimi në mes dy shteteve dhe popujve.
Po ashtu, ato janë kundër interesit të qytetarëve serbë të Kosovës të cilët kanë vendosur të jetojnë në Kosovë.” (D.D/Shuplaka)
