Ministri i Kulturës, Rinisë dhe Sportit të Kosovës, Kujtim Shala, në konsultim me Këshillin e Librit, ka vendosur që Çmimi Ndërkombëtar “Letërsia Shqipe” t’i jepet shkrimtarit Ismail Kadare, “për kontributin e madh dhënë letërsisë shqipe dhe asaj botërore”.
Ky çmim jepet për personalitetet letrare, të cilët, me veprën e tyre, kanë ushtruar një ndikim esencial në emancipimin e shoqërisë, ngritjen dhe vetëdijesimin e përgjithshëm për vlerat emancipuese, me theks të veçantë, përmes fushës së letërsisë, duke ndikuar kështu në njohjen e saj në përmasa ndërkombëtare.
Çmimi në fjalë u jepet personaliteteve, shtetas të Republikës së Kosovës, Shqipërisë, apo ndonjë shteti tjetër, që kanë dhënë kontribut të çmuar për letërsinë shqipe.
Ministri Shala vlerësoi se Kadare, e vë këtë çmim në një standard të lartë ndërkombëtar.
Ky çmim, si i tillë, do të jetë një ndihmesë për pranimin, njohjen dhe afirmimin e mëtejmë të letërsisë shqipe, sipas autoriteteve kosovare të kulturës.
Shala më tej shtoi se një çmim dhe vlerësim i tillë i ka munguar letërsisë shqiptare, raportojnë mediat kosovare.
Ceremonia e solemne do të zhvillohet në Prishtinë. (M.D/ Shuplaka)
Discussion about this post