Në prag të zgjedhjeve të 11 qershorit në Kosovë, ish-kryeministri Ramush Haradinaj, është shprehur rreth problemeve shqetësuese të vendit të tij. Në një intervistë për “Zërin e Amerikës”, kandidati për kryeministër nga koalicioni PDK-AAK-Nisma, është ndalur në disa çështje.
I pyetur se çfarë pret në këto zgjedhje, ai është shprehur se synohet fitorja e zgjedhjeve dhe në fakt ashtu parashihet. Haradinaj e ka cilësuar fushatën si të qetë, pa incidente.
Lidhur me koalicionin me Partinë Demokratike të Kosovës, Haradinaj tha se është një vlerësim i kësaj partie për të, për Aleancën për Kosovën, për Nismën.
“Ne i shohim dy vështirësi për Kosovën. Një prej tyre janë këto vështirësitë e jashtme, ndërhyrjet nga Serbia janë rrezik për Kosovën se stagnimi i gjatë krijon rrethana për veprime të armiqve të paqes e të armiqve të progresit. Njëkohësisht, tendenca në rritje e lëvizjeve ekstreme islame po ashtu e rrezikon jo veç Kosovën po edhe rajonin.
Por, problemi kryesor mendoj te ne është mënyra si ne qeverisim, pra një korrupsion që është rritur, një mosefikasitet i të gjitha institucioneve dhe administratës, rënie e besimit pra këto janë problemet e Kosovës, ne do të jemi seriozë dhe të vendosur që të përballemi.”, është shprehur ndër të tjera Haradinaj i pyetur mbi problemet shqetësuese në Kosovë.
(XH.A/SHUPLAKA)
