Liderët e Kosovës dhe ata të Serbisë kanë rënë dakord për vazhdimin e dialogut mes dy vendeve. Kjo u arrit gjatë takimit të zhvilluar në Bruksel, ku ishin të pranishëm: Presidenti i Kosovësm, Hashim Thaçi, Kryeministri i Kosovës, Isa Mustafa, Presidenti i Serbisë, Tomislav Nikolic dhe Kryeministri i Serbisë, Aleksandar Vucic.
“Kemi rënë dakord që të vazhdojmë dialogun për normalizimin e marrëdhënieve mes dy vendeve tona. Gjithashtu do të provojmë të ulim tensionet, të veprojmë me përgjegjësi dhe të frenojmë veten”, u shpreh kryeministri serb.
Ai shtoi se do të komunikojë me zyrtarët serbë që do të përfshihen në dialog, që të veprojnë në bazë të marrëveshjes së arritur.
E pranishme në këtë takim ishte edhe Shefja e Politikës së Jashtme të Bashkimit Europian, Federica Mogherini.
Përmes një deklarate me shkrim, ajo falenderoi të dyja palët për takimin konstruktiv dhe vlerësoi vendosmërinë dhe angazhimin e treguar nga katër liderët politikë për të adresuar zgjidhjen e problemeve.
Deklarata e plotë e Mogherinit:
Sot, Presidentët Tomislav Nikoliq dhe Hashim Thaçi dhe Kryeministrat Isa Mustafa dhe Aleksandar Vuçiq mu bashkuan në një takim të nivelit të lartë në Dialogun për normalizim marrëdhëniesh mes Beogradit dhe Prishtinës.
Dua t’i falënderoj për takimin e hapur dhe shumë konstruktiv që patëm. Ata diskutuan lidhur me zhvillimet e fundit, dhe u morën vesh që të lënë tensionet prapa e të punojnë së bashku.
E ritheksova se progresi i normalizimit të marrëdhënieve mes Kosovës dhe Serbisë është esencial, për Kosovën dhe Serbinë, për Bashkimin Evropian dhe për regjionin e Ballkanit Perëndimor. Avancimi i Dialogut është çelës për lëvizjen përpara të të dy palëve drejt Bashkimit Evropian.
Jam e inkurajuar nga lidershipi, vizioni, vendosmëria dhe angazhimi i treguar nga liderët politikë sot për të adresuar zgjidhjen e problemeve të përbashkëta përmes Dialogut.
Të dyja palët u pajtuan që Dialogu të vazhdojë në respekt, bashkëveprim dhe kuptim të ndërsjellë. Diskutimet mes palëve do të intensifikohen ditëve në vijim. Kemi vendosur që të kemi një seri të takimeve të Dialogut të nivelit të lartë, duke nisur nga ditët në vijim.
Dua të falënderoj edhe një herë presidentët dhe kryeministrat për sinqeritetin dhe angazhimin e fuqishëm në Dialog. Tani do të punojmë bashkë drejt konstruktivitetit dhe konkretisht për të sjellë dobi për të gjithë njerëzit në Serbi dhe në Kosovë, duke avancuar konkretisht rrugët e tyre drejt Evropës.
Unë si ndërmjetësuese e Dialogut do të vazhdoj të jem e përfshirë personalisht në përkrahjen e implementimit të plotë të dalë nga takimi i sotëm, i marrëveshjeve të arritura dhe të progresit të ardhshëm në normalizimin e marrëdhënieve të të dyja palëve.
(XH.A/SHUPLAKA)
