Kosovë, shkarkohet Kryetari i Bashkësisë Islame në Kaçanik, Lejoi lajmërimin e vrasjes së terroristit Muhxheri në xhami

Bashkësia Islame e Kosovës ka njoftuar se ka shkarkuar kryetarin e BIK të Kaçanikut, Florim Neziraj.

Vendimin e kryesisë së Bashkësisë Islame të Kosovës (BIK) për shkarkimin e Nezirajt e konfirmoi për emisionin “Jeta në Kosovë, këshilltari i BIK Vedat Sahiti.

“Kryetari i BIK në Kaçanik është revokuar sepse veprimi i tij ka qenë i pakonsultuar me kryesinë e BIK”, tha Sahiti duke iu referuar njoftimit që ishte dhënë nga xhamia në Kaçanik për vrasjen e Muhaxherit në frontet e luftës në Siri. Florim Neziraj është shkarkuar, tani është vetëm imam”, deklaroi ai.

Njoftimi i dhënë nga xhamia e Kaçanikut për vrasjen e Muhaxherit kishte shkaktuar reagime të ashpra në opinion, ndërsa vetë Neziraj, kishte konfirmuar se bashkë me disa imamë nga Kaçaniku më 8 qershor, ditën kur u dha lajmi për vrasjen e Lavdrim Muhaxherit, kishte shkuar për ngushëllime në familjen e tij.

Lavdrim Muhaxheri ishte pjesë e organizatës terroriste ISIS. Ai u vra në fillim të këtij muaji nga një sulm amerikan. (B.H/Shuplaka)