Ministri i Jashtëm grek Niko Kotzias është shprehur se Athina zyrtare do mbështesë integrimin evropian të Shqipërisë, por kjo kur vendi ynë te këtë plotësuar disa kushte mes te cilave dhe respektimin e te drejtave dhe pronës se minoritetit grek ne Shqipëri.
Gjate konferencës se përbashkët ne Athinë me Ministrin e Jashtëm gjerman Shtajnmajer, kryediplomati grek u shpreh se me Shqipërinë po punohet për të gjetur zgjidhje te përbashkëta për problemet qe vijnë nga e kaluara dhe për të përcaktuar të ardhmen.
“Janë ngritur gjashtë grupe konsultative për probleme të veçanta, mbi një grup të madh ombrellë që është përgjegjësi e Sekretarëve të Përgjithshëm të dy shteteve. Për fat të keq, në Shqipëri ka një tendencë në rritje të nacionalizmit në prag të zgjedhjeve. Rekomandimi im dhe inkurajimi im për të gjithë është që të ulen tonet, për të rënë dakord në një rrugë evropiane, dhe si ne mund të zgjidhim menjëherë problemet tona, duke mos lejuar që ato të ndërhyrjnë në procesin e integrimit europian të Shqipërisë”,. tha ai.
Më 12 dhjetor do dëgjohen konkluzionet e Këshillit Europian për Shqipërinë dhe sipas Kotzias, Greqia e do Shqipërinë në BE pasi fqinjët e saj në Europë janë dhe fitim i madh për të. Por sipas tij, vendi ynë duhet te përmbushë kriteret e caktuara.
“Kritere që kanë lidhje me gjyqësorin, reformën administrative, luftën kundër krimit të organizuar, veçanërisht masat për të luftuar drogën, pasi është vendi më i madh prodhues i drogës në rajon, të mbrojë të drejtat dhe pronat e minoritetit grek. Duhet të tejkalohet logjika e “Hoxhës”, sipas të cilit minoritar është vetëm ai që jeton në këtë zonë dhe popullsitë e mëdha, që janë shumicë në disa zona, të mos kenë të drejtat e pakicave. Këto duhet t’i plotësojë Shqipëria dhe pastaj ne ta ndihmojmë në procesin e integrimit”, shtoi Nikos Kotzias.
Deklaratat e ministrit grek vijnë pas një sërë deklaratash jomiqësore mes Tiranës dhe Athinës zyrtare.
