Komisioneri Publik do të apelojë në Kolegjin e Posaçëm të Apelimit për konfirmimin në detyrën nga KPK të kryeprokurorit të Krujës Petrit Çanon dhe për Kreun e Gjykatës Administrative të Gjirokastrës Ramiz Lala.
Sipas informacioneve, IKP-ja pretendon se dy funksionarët e lartë të drejtësisë nuk kanë paraqitur prova të mjaftueshme për t’u konfirmuar në detyrë.
“Komisioneri Publik mbështetur në kompetencën e tij kushtetuese dhe ligjore, nga shqyrtimi i vendimit nr. 183, datë 19.7.2019, dhe provave të administruara nga Komisioni, vlerëson se ato janë të pamjaftueshme për të vendosur konfirmimin në detyrë të subjektit të rivlerësimit.
Nëpërmjet ankimit, Komisioneri Publik kërkon kryerjen e një hetimi të mëtejshëm për të tria kriteret e rivlerësimit, duke ia paraqitur për shqyrtim shkaqet e këtij ankimi, juridiksionit kontrollues dhe rivlerësues të Kolegjit”, thuhet në njoftimin për kryeprokurorin e Krujës Petrit Çano.
Gjithashtu edhe për Kreun e Gjykatës Administrative të Gjirokastrës Ramiz Lala, Komisioneri Publik shprehet se nuk ka paraqitur prova të mjaftueshme për konfirmim në detyrë.
“Në të tilla rrethana, Komisioneri Publik vlerëson se vendimi i Komisionit, në tërësinë e tij, ka shkaqe të mjaftueshme ligjore për një hetim të mëtejshëm nga Kolegji i Posaçëm i Apelimit dhe kërkon që, në përfundim të gjykimit të çështjes, të vendosë:
– Ndryshimin ose lënien në fuqi të vendimit nr. 190, datë 26.7.2019, të Komisionit të Pavarur të Kualifikimit, për subjektin e rivlerësimit, z. Ramiz Lala.”
Në 19 korrik, KPK-ja vlerësoi pozitivisht Petrit Çanon, ndërsa një javë më vonë vlerësoi si të saktë verifikimet për Ramiz Lalën.
(K.H/Faxweb.al)
