Kryeministri Edi Rama kishte dalë garant se ish-kryebashkiaku i Kavajës Elvis Roshi nuk kishte qenë asnjëherë i dënuar. Pas arrestimit të tij, muaj më parë, Roshi dha dorëheqjen nga detyra e tij, por nuk u shkarkua nga kryeministri, i cili i doli edhe në krah.
Por edhe sot, pak minuta pas KQZ kishte vendosur heqjen e mandatit për Roshin, Rama sërish nuk e përmendi ish-kryebashkiakun e Kavajës, por sulmoi PD-në, që sipas tij votoi kundër heqjes së mandatit për deputetin Dashamir Tahiri (referuar votimin 4-3 në KQZ).
“U rrokanis kokën shqiptarëve për ligjin e dekriminalizimit dhe e shqelmon ligjin me të parën në mbrojtje të problematikut të vet”, shkruan Rama në Facebook.
Akuzat që rëndojnë mbi Elvis Roshin, sipas Prokurorisë:
Një dënim për veprën penale të “Përdhunimit” në grup, në vitin 1995 në Itali
Nuk ka deklaruar përdorimin e disa emrave në Zvicër
Në prill 1993 ka hyrë në mënyrë të paligjshme në shtetin zviceran dhe ka kërkuar azil, 14 maj 1993, është ndaluar nga policia e Zyrihut për një rast droge dhe është dëbuar 4 muaj më vonë.
Në korrik 1997 ka hyrë përsëri në mënyrë të paligjshme dhe ka kërkuar azil. Në gusht 1997 është dëbuar sërish.
Në vitin 2015 DEA/USA , ka informuar autoritetet zvicerane se po hetonin një shtetas të quajtur Enver Rroshi për trafik droge dhe pastrim parash.
Çfarë pat thënë Rama për Elvis Roshin:
“Nuk ka asnjë kandidat që të jetë dënuar në gjykatë shqiptare apo jashtë vendit…Të tjera janë dokrra”.
Ndërkohë në një intervistë tjetër ai ka pasqyruar një tjetër realitet.
“Ka ndërruar emrin sepse është përzënë nga Italia për mungesë dokumentash…Të gjykojmë një person që ka qënë emigrant sepse nuk ka pasur dokumenta. Ne nuk kemi asnjë të dënuar në garë”, ka thënë ai. (A.R/SHUPLAKA)
