KQZ informon: “35.78% pjesëmarrja në total në rang vendi”, raportimi ende i mangët

Deklarata për mediat në orën 16:00

Në deklaratën për mediat të orës 16:00, zëdhënësja e KQZ-së bëri të ditur se pjesëmarrja e deritanishme në votime në rang vendi ka arritur në 35.78%. Ajo theksoi se kjo vlerë ndryshon herë pas here për shkak të raportimeve që vijnë vazhdimisht në KQZ nga qendrat e votimit nëpër qarqe. Në orën 16:00 kanë raportuar 606 qendra votimi, thënë ndryshe 11.3% e totalit.

Ajo theksoi gjithashtu se ka ende shumë qendra votimi që nuk kanë raportuar.

Konkretisht, pjesëmarrja paraqitet e tillë në rrethe: Në qarkun e Beratit 43.51%, në Durrës 33.12%, në Elbasan 34.25%, në Fier 33.36%, në Gjirokastër 38.14%, në Korçë 36.58%, në Lezhë 33.86%, në Shkodër 29.55%, në Tiranë 36.41%, në Vlorë 31.91%. 

Deklarata për mediat në orën 13:00

Në një deklaratë të dytë për mediat, zëdhënësja e Komisionit Qendror të Zgjedhjeve, Drilona Hoxhaj, bëri me dije se pjesëmarrja deri më tani në rang vendi është 25.69%. Nga 5362 qendra votimi, vetëm 26% , 1414 qendra votimi kanë raportuar. Krahasuar me këtë vit, pjesëmarrja në 2013-ën ishte 53.47%.

KQZ u bëri apel komisionerëve që të përcjellin të dhënat në sistemin e KQZ-së pasi ky është një detyrim i tyre që duhet ta zbatojnë. Veç kësaj, në apelin drejtuar Qarkut të Kukësit, zëdhënësja e KQZ-së kërkoi që të bëjnë raportime.

Konkretisht, pjesëmarrja deri tani në disa prej qarqeve është: 27.42% në Berat, 23.12% në Elbasan, 21.79% në Fier, 27.23% në Gjirokastër, 28.49% në Korçë, 31.92 në Lezhë, 31.07% në Shkodër, 29.76% në Tiranë, 22.17% në Vlorë.

Deklarata për mediat në orën 10:00

Në një deklaratë për mediat, Komisioni Qendror i Zgjedhjeve bëri të ditur se deri tani pjesëmarrja në rang vendi është 12.16%. Mësohet se kanë raportuar25% qendra votimi deri më tani.

KQZ deklaroi se pjesëmarrje më të lartë ka pasur në qarkun e Beratit, Dibrës, Lezhës, ndër të tjera dhe më të ulët në qarkun e Korçës dhe Vlorës.

Konkretisht, pjesëmarrja në: në Berat 14.22% , në Dibër 14.31%, në Durrës 13.53%, në Elbasan 10.86%, në Korçë  9.29%, në Lezhë 14.99%, në Shkodër 13.33%, në Vlorë 9.46%, në Tiranë 13,97%.

(XH.A/SHUPLAKA)