Komisioni Qendror i Zgjedhjeve u heq mandatet kryebashkiakut Elvis Rroshi dhe deputetëve Dashamir Tahiri e Shkëlqim Selami. Mësohet se për kryebashkiakun Rroshin dhe Selamin vendimi ka qenë unanim, ndërsa për Dashamir Tahirin votimi ka qenë 4 me 3.
Vetëm pak pas marrjes së vendimit, mësohet se vendimi për heqjen e mandatit të Rroshit i është dërguar kryeministrit. Biba u shpreh gjatë publikimit të vendimit, se tashmë i takon kryeministrit të vendosë për kryebashkiakun e Kavajës.
Pak përpara se Komisioni Qendror i Zgjedhjeve të tërhiqej për të marrë vendimin, kreu Denar Biba, vuri theksin tek puna e Prokurorisë së Përgjithshme që ka hetuar tre rastet. Referuar kryesisht akuzave ndaj kryebashkiakut Rroshi, Biba u shpreh se Prokuroria nuk e ka kryer siç duhet detyrën e saj.
“Akuzohet se ka kryer marrëdhënie seksuale. Dënimi për këtë vepër nuk ekziston. Nuk mund të dalim më katolikë se Papa e të themi që kryerja e marrëdhënies seksuale është e turpshme. Për fat të mirë, KQZ nuk mban përgjegjësi për këto argumente, i takon Prokurorisë.”, u shpreh ndër të tjera Biba.
Ai theksoi se vendimi që KQZ do të marrë lidhur me tre mandatet, të kryebashkiakut Rroshi dhe deputetëve Tahiri e Selami, nuk është vendimtar. “Vendimi që do të marrim uroj të merret në konsideratë nga gjykatat. Por ne jemi thjesht operatorë të ligjit.” (XH.A/SHUPLAKA)
Discussion about this post