Komisioni Qendror i Zgjedhjeve ka dalë në një deklaratë për mediat, ku ka apeluar që partitë politike të dorëzojnë raportet financiare vjetore të tyre, sa më shpejt të jetë e mundur.
Duke marrë në konsideratë që vetëm tre muaj na ndajnë nga zgjedhjet e 18 qershorit, kërkohet që KQZ të njihet me këto raporte financiare.
Në deklaratën për mediat, zëdhënësja e Komisionit Qendror të Zgjedhjeve, Drilona Hoxha, u shpreh se edhe subjektet e lidhura drejtpërdrejt me partitë politike do të kontrollohen. KQZ bën me dije se afati i fundit i dorëzimit të raporteve financiare vjetore nga partitë politike është data 31 mars.
Deklarata e plotë e KQZ-së:
Në zbatim të nenit 15/2, neni 23, të ligjit nr. 8580, datë 17.02.2000, “Për Partitë Politike”, i ndryshuar, si dhe akteve të miratuara nga KQZ, ju kujtojmë partive politike të regjistruara në Gjykatën e Rrethit Gjyqësor të Tiranës, detyrimin për të depozituar raportet financiare vjetore të vitit 2016, jo më vonë se data 31.03.2017.
Sipas ligjit “Për Partitë Politike”, partitë politike, dorëzojnë raportet financiare vjetore një herë në vit pranë KQZ dhe duhet të jenë sipas regullave për raportimin e financimit, për monitorimin, mbikëqyrjen dhe auditimin financiar të partive politike, si edhe duhet të përmbajnë informacion të hollësishëm për:
a) burimet e financimit në bazë të formatit të standardizuar, të miratuar nga Komisioni Qendror i Zgjedhjeve;
b) shpenzimet
c) subjektet e lidhura, drejtpërdrejtë ose tërthorazi, me partitë politike apo që kontrollohen prej tyre, të cilat deklarohen nga vetë partia politike.
Raportet duhet të depozitohen nëpërmjet personave përgjegjës për financat e partive politike, sipas formateve të standardizuara për raportimet financiare vjetore të miratuara me vendim të Komisionit Qendror të Zgjedhjeve.
Theksojmë se, afati për dorëzmin e raporteve financiare nga partitë politike është jo më vonë se data 31.03.2017.
(XH.A/SHUPLAKA)
Discussion about this post