Komisionin Qendror i Zgjedhjeve i ka dhënë fund polemikave dhe retorikës së ashpër që ka shoqëruar zbatimin ose jo të votimit dhe numërimit elektronik.
Kjo pasi pritet miratimi i fondit të buxhetit të ri për zgjedhjet e 18 qershorit, ku nuk është parashikuar asnjë shpenzim për votimin dhe numërimin elektronik, referuar burimeve për një portal online. Një ditë më parë, KQZ ka diskutuar buxhetin e ri zgjedhor që kap shifrën e 733 milionë lekëve të rinj, thënë ndryshe 6 milionë dollarë.
Në këtë buxhet, rreth 275 milionë lekë (2.1 milionë dollarë) do të shpenzohen për pagat dhe shpërblimet e punonjësve të përkohshëm.
“Me vendimin nr.16, date 17.01.2017, Komisioni Qendror i Zgjedhjeve ka miratuar strukturën e personelit shtesë të KQZ-së për zgjedhjet e datës 18 qershor 2017. Në të njëjtin vendim është përcaktuar edhe kohëzgjatja e kontratës, si edhe kategoria e pagës për secilin pozicion.
Punonjësit e përkohshëm do të paguhen mbështetur në VKM Nr.589, datë 17.07.2013, ‘Për disa shtesa dhe ndryshime në VKM Nr.545, datë 11.08.2011 të Këshillit të Ministrave’. Nga ana e drejtorisë së Financës është bërë llogaritja e fondit të pagave dhe sigurimeve shoqërore në përputhje me VKM-të e sipërcituara, si edhe legjislacionit tjetër që përcakton masën e sigurimeve shoqërore, shëndetësore dhe tatimin mbi të ardhurat personale.
Në total për procesin e ardhshëm zgjedhor është parashikuar të punësohen në total 342 punonjës me kontratë të përkohshme. Kostoja totale e pagave të personelit të përkohshëm është 68.8 milionë lekë”, thuhet ndër të tjera në relacionin e buxhetit.
(XH.A/SHUPLAKA)
Discussion about this post