Pas incidentit me trenin serb, që kërkonte të hynte në veri të Kosovës, nuk kanë munguar deklaratat e ndërsjellta nga të dyja krahët dhe ku ranë në sy ato të Beogradit zyrtar, që disa herë folën edhe për përdorim ushtarak nëse preken qytetarët serbë në Kosovë.
Pak ditë më parë, pas kërcënimit të presidentit serb Tomislav Nikoliç se “mund të dërgojë ushtrinë në Kosovë”, reagoi edhe ish-kryeministri i Shqipërisë dhe deputeti i Partisë Socialiste Pandeli Majko.
“Të kuptuarit e luftës është akt dhe jo deklaratë. Kjo do pak mencuri në të kuptuar, e cila kombit serb, si rregull, nuk i ka munguar. Për më tepër, shqiptarët kanë një të metë kombëtare. Ata janë më të aftë në luftë se sa në paqe”, shkruante deputeti i PS-së.
Por cila është forca ushtarake e Serbisë dhe ajo e Shqipërisë?
Sipas “Global Fire Power”, faqe e specializuar në krahasimin e ushtrive të 126 vendeve të botës, Serbia duket se ka një ushtri më të fortë se e jona pasi edhe shpenzimet e qeverisë së Beogradit në këtë fushë janë shumë më të larta.
Kështu nëse Shqipëria shpenzon rreth 110 milionë dollarë në vit për mbrojtjen, Serbia shpenzon rreth 8 herë më shumë, 830 milionë dollarë.
Shqipëria është pjesë e NATO-s, ndërsa Serbia mbështetet te forca dhe afrimiteti me Rusinë.
Të dhënat sipas Global Fire Power:
SHQIPËRIA:
Rënditja – 90 (nga 126)
Popullsia – 3 020 209 banorë
Sipërfaqja – 28 748 km katrorë
Forca ushtarake aktive – 14 500
Rezervistë – 5 000 rezervistë
Avionë luftarakë – 0
Helikopterë – 21
Aeroporte të përdorshme – 4
Anije të flotës bregdetare – 17
Rrjet rrugor – 18 000 km
Rrjet hekurudhor – 339 km
Prodhim nafte – 23 390 fuçi nafte në ditë
Buxheti për ushtrinë – 110 milionë $
SERBIA:
Rënditja 83 (nga 126)
Popullsia – 7.209.764 banorë
Sipërfaqja – 77.474 km katrorë
Ushtarë aktivë – 52.000 ushtarë aktivë
Rezervistë – 170.000 rezervistë
Avionë luftarakë – 119
Helikopterë – 39
Makineri lufte – 225
Aeroporte – 26
Anije luftarake – 0
Prodhim nafte – 11.500 fuçi nafte
Rrjet rrugor – 41.913 km
Rrjet hekurudhor – 3379 km
Sisteme raketore – 82
Buxheti për ushtrinë – 830 milionë $ (A.R/SHUPLAKA)
