Kryetari i Kuvendit, Ilir Meta, u pyet nga gazetarët nëse LSI do të jetë e gatshme për ndonjë koalicion të mundshëm me PS-në. Ai tha se “krahët janë të hapura për të dyja partitë”, teksa u ndal tek koalicioni me Partinë Socialiste në vitin 2013.
Krahët e LSI-së janë të hapura apo të mbyllura për Edi Ramën?
“Janë të hapura për të gjithë dhe mund të them që LSI duhet edhe të falënderojë të dy kryetarët e partive për këtë përjashtim, që ata nuk e kanë bërë me qëllim, por për shkak të kohës ndoshta të ngushtë të koalicioneve. Pasi vërtetë kjo dëmton disa parti, e sidomos partitë e reja, por kam dëgjuar shumë komente qëllimkeqe që duan të krijojnë idenë sikur është bërë një marrëveshje kundër LSI-së. Në fakt, kjo është marrëveshja që ndihmon shumë dhe favorizon shumë LSI-në.
Mjafton t’ju them që në mënyrë shumë të qartë me rezultatet e zgjedhjeve vendore të vitit 2015, LSI-ja merr të paktën 34 mandate deputetësh në të gjithë vendin.
Po të kthemi në realitetin e sotëm mbas dy vjetësh kuptohet që rritja do të jetë në një progresion ndoshta të pamenduar: mjafton t’ju them që sipas 2015-s ka të paktën 7 mandate të sigurta në Tiranë, 4 mandate në Durrës, 4 në Fier, 4 në Elbasan, 3 në Korçë, e shumë qarqe të tjera.
Kështu që këto lloj komentesh tregojnë një dëshpërim të analistëve të caktuar, të cilët kanë dashur që këtu të bëhet një luftë, një konfrontim, këtu palët të përjashtohen a mundësisht të vriten që ato të bëjnë ato lajmet e tyre dhe gjithmonë të gjejnë armiq të cilët duhen ndëshkuar në mënyrë të pakthyeshme. Jemi në moment pozitiv dhe të ecim përpara me qetësi, me dashuri dhe pa xhelozi. “, është shprehur ndër të tjera ish-kreu i LSI-së.
(XH.A/SHUPLAKA)
