Kreu i Bashkisë së Fierit, Armando Subashi ka shkruar në rrjetet sociale se ka marrë garancinë që impianti i shumëpërfolur në Verri nuk do të ndërtohet.
“As që bëhet fjalë të fillojë ndërtimi i impiantit të mbetjeve urbane, pavarësisht procedurave që janë ndjekur nga Ministritë deri tani”,- ka shkruar Subashi.
POSTIMI:
Sot mora garancinë e plotë nga kryeministri Edi Rama, që pa pëlqimin e banorëve të zonës (Verri, Kallm i Madh, Kallm i Vogël), as që bëhet fjalë të fillojë ndërtimin i impiantit të mbetjeve urbane, pavarësisht procedurave që janë ndjekur nga Ministritë deri tani.
Kjo është Rilindja!
Kjo është Shqipëria që duam!
#ShtetPunëMirëqenie
Banorët e Verrisë dhe Kallmit në Fier janë ngritur prej kohësh në protestë.
Sipas banorëve, shkaku i protestës kanë qenë punimet intensive që po kryhen në vendin ku do të ndërtohet impianti i përpunimit mbetjeve urbane.
Banorët kanë këmbëngulur që firma të ndërpresë punimet e të largohet sepse kjo përbën rrezik për shëndetin e tyre.
Rama ndërkohë sot ishte në Apolloni të Fierit me të rinjtë. Megjithatë, në rrjetet sociale banorët e Verrisë shprehen skeptikë që kjo të ndodhë deri në momentin që do të largohen mjetet e punës për impiantin.
A po e përdor Rama këtë si kartë elektorale teksa zgjedhjet janë kaq afër duke qetësuar zërat në këtë zonë zgjedhore? Banorët e zonës kanë protestuar prej kohësh por janë përballur me neglizhencën e autoriteteve. (M.D/ Shuplaka)
Discussion about this post