Kreu i FMN-së në Tiranë, Jens Reinke, ka folur gjerësisht për marrëveshjen e përfunduar me Shqipërinë, sfidat që u deshën të përballeshin gjatë përqëndrimit në këtë marrëveshje dhe si pritet të jetë situata gjatë vitit 2017.
Ai u shpreh në një intervistë në “Scan TV” se program ende nuk ka përfunduar, megjithatë kjo marrëveshje qe një sukses i madh, nëse merret në konsideratë edhe vetëm fakti se borxhi publik është në një trajektore rënëse.
I pyetur nëse kishte disa pika problematike gjatë zbatimit të këtij programi, Reinke u shpreh se një program pa probleme nuk do të ishte një program i mirë dhe sfidues, megjithatë ai renditi disa pika ku u hasën vështirësi:
“Patjetër që reformat hasin rezistencë se për ndryshe nuk janë efektive dhe ka pasur të tilla raste. Në disa pjesë të programit kanë qenë të dhimbshme. Për shembull konsolidimi fiskal, është një proces ku ti përpiqesh të rrisësh të ardhurat apo të menaxhosh më mire shpenzimet, apo disa here t’i shkurtosh ato dhe kjo nuk është diçka e thjeshtë, por është e rëndësishme të shkohet në këtë proces dhe kjo është pozitive. Edhe reformat ë tjera hasin kundërshti, por ka pasur vullnet nga qeveria dhe populli shqiptar për të shkuar para.”, u shpreh Reinke.
I pyetur nëse ka ende reforma që i duhen Shqipërisë, kreu i FMN-së në Shqipëri tha se nevojiten reformat aktuale dhe të reja, duke përmendur këtu reformën në drejtësi.
Sa i përket dinamikave të vitit 2017 dhe rreziqet që mbart, Reinke foli për reforma jo thellësisht të ndryshme nga ato që janë parë deri tani.
“Është shumë e rëndësishme të forcohet zbatimi i ligjit, parashikueshmëria për investitorët përfshirë edhe investitorët e huaj dhe kjo ka një impakt direkt për vendimet e investitorëve, për të tërhequr investitorët e tjerë. Rreziqe të tjera gjithashtu lidhen me mjedisin e jashtëm. Ju jeni një vend mjaft i integruar me vendet e eurozonës dhe eurozona ende nuk është në atë pjesë të rimarrjes së vetes siç ne kemi shpresuar.”, tha Reinke teksa u shpreh se viti 2017 mund të ketë pasiguri të mëdha lidhur drejtpërdrejtë me “Brexit” me të cilën Shqipëria nuk lidhet drejtpërdrejtë. (XH.A/SHUPLAKA)
