Kreu i KQZ, Klement Zguri mbrëmjen e sotme ishte i ftuar në emisionin “Natë me Xhaxhiun”, ku foli për procesin e rinumërimit të 64 kutive të kontestuara nga PDIU dhe PS në Tiranë.
Kujtojmë se pas procesit të rinumërimit të votave, rezultati përfundimtar nuk ndryshoi dhe shpëtim Idrizi nuk e fitoi mandatin e fundit në Tiranë, megjithatë rezultuan shumë parregullsi.
Zguri tha se gabimet ishin për shkak të komisionerëve dhe numëruesve të cilët nuk ishin të patrajnuar mirë.
“Gabimet ishin për shkak të komisionerëve të patrajnuar mirë dhe kjo është e pafalshme. Votat përfunduan më vonë në Tiranë në krahasim me qarqet e tjera. Pas rinumërimit nuk kishte ndryshime mandati dhe kjo nuk e cënon procesin zgjedhor. Por sigurisht është alarm dhe gabimet nuk duhet të përsëriten”- tha Zguri.
Sakaq Zguri ka sqaruar gjithashtu edhe arsyet se përse është refuzuar kërkesa e PDIU-së për rinumërimin e votave në të gjithë qarkun e Tiranës.
“Profesionalisht do ishte shumë e ulët. A ka gjykim pa mosmarrëveshje? Në Tiranë nuk kishte asnjë ankimim nga asnjë komisioner. Nuk i druheshim lodhjes, por si mund të hapet një qark pa pasur prova dhe fakte? Ose një shënim se ka pasur neglizhencë nga komisionerët apo nga numëruesit”, deklaroi kreu i KQZ-së. (D.D/Shuplaka)
