Pas kalimit të ligjit “Për lojërat e fatit” në Kuvend, ka folur edhe kreu i Shoqatës së Basteve Sportive, Artan Shyti , i cili ka zbuluar se disa kategori lojërash fati do të vijojnë të operojnë. Për kreun e Shoqatës së Basteve Sportive mbetet ende për t’u parë se si do të operohet pas miratimit të ligjit, ndërsa ka cilësuar si një opsion të mundshëm monopolin e shtetit.
“Disa lojëra fati do vazhdojnë, janë 7 kategori lojërash fati, 2 ngelen dhe 5 të tjera do mbyllen. Do shikojmë dhe cilat do jenë zhvillimet sepse me ç’kuptuam do shikohet hapësira se si mund të operohet dhe një opsion tjetër është monopoli i shtetit i cili në një farë mënyre është vullneti që të materializohet me veprime konkrete”, tha Shyti.
Shyti komentoi edhe propozimet ndaj qeverisë, duke u është shprehur se tashmë është e kotë,sepse propozimet janë bërë para se ligji të shkonte në parlament.
“Ne thamë që do të reduktohen pikat e basteve nga 4300 që janë sot në 1500 ndoshta edhe më pak; të përpiqeshim të hiqeshin të gjitha reklamat në pikat e basteve; do të forcohej kontrolli në njerëzit që hyjnë dhe që kanë problem; do të respektojmë ligjin që s’ka hyrë akoma në fuqi dhe që duhet të hynte prapavija që kishim me institucionet përkatëse nga janari; do rregullohej distanca. Domethënë shumë gjëra që sot për fat të keq me të drejtë qeveria konstaton si probleme që ka ky sektor. Këto propozime ishin konkrete që iu ofruan Komisionit Parlamentar. Nuk na thirri njeri të na thoshte që i kemi shkruar, pse i kemi shkruar”, u shpreh ndër të tjera kreu i Shoqatës së Basteve.
