Arben Kraja është kandidati i dytë që paraqet para Këshillit të Lartë të Prokurorisë platformën e tij për t’u bërë kryetar i Strukturës së Posaçme Antikorrupsion.
Gjatë fjalës së tij, Kraja u shpreh se ka bashkëpunuar me ndërkombëtarët për disa ligje, ndërsa pati kritika për luftën kundër korrupsionit në nivele të larta. Sipas tij, duhet bërë më shumë në këtë drejtim duke garantuar një zbatim korrekt të ligjit në praktikë.
“Do të paraqes në mënyrë të përmbledhur vizionin tim për drejtimin e SPAK. Jam i ndërgjegjshëm për punën që na pret për ngritjen dhe efektivitetin e kësaj strukture.Vlerësoj KLP për mënyrën profesionale dhe transparente në përzgjedhjen e prokurorëve për SPAK dhe sot për garën për drejtuesin e saj. Kam eksperiencë drejtimi, e cila garanton suksesin tim në drejtim të institucionit. Drejtuesi do të ketë eksperienca manaxheriale, njohuri administrative, financiare.
Kam bashkëpunuar me organizatat ndërkombëtare për draftimin për sekuestro parandaluese. Kërkoj besimin e KLP për të drejtuar këtë institucion të ri ku të vë në praktikë aftësitë e mia drejtuese. Kam punuar me asistencën ndërkombëtare për draftet e para për funksionimin e SPAK dhe ngritjen e BKH. Publiku të informojë në kohë për fillimin e hetimeve dhe për rezultatet e hetimeve. Kemi dështuar në ndëshkimin e korrupsionit në nivel të lartë ose krimit të organizuar.
Situata është shqetësuese. Nga pamja ligjiore jemi të mbrojtur, duhet zbatimi korrekt i ligjit në praktikë. Pavarësia e prokurorëve do të garantojë suksesin e këtij institucioni”, tha kandidati Arben Kraja.
I pyetur nga anëtari i KLP, Vatë Staka sesi planifikon të plotësojë organikën e Prokurorisë së Posaçme Antikorrupsion, Kraja deklaroi se ka dy mënyra për ta bërë këtë gjë.
“Nga 15 prokurorë që ka caktuar KLP për nisjen e SPAK, kemi vetëm 8. Kemi 2 mundësi ligjore për plotësim: drejtuesi mund të caktojë një prokuror të përkohshëm që plotëson kriteret për të ushtruar veprimtari në SPAK. E dyta, drejtuesi i SPAK mund t’i kërkojë Prokurorisë së Përgjithshme prokurorë për një detyrë specifike në SPAK”, tha Arben Kraja.
Pak minuta më parë ishte Altin Dumani ai i cili foli para KLP për platformën e tij nëse do të zgjidhet në krye të SPAK.
Discussion about this post