I ftuar në rubrikën “Opinion” analisti Fatos Lubonja ka komentuar sot zhvillimet politike në vend duke i lidhur këto që me kohën e udhëheqjes së PD-së nga Azem Hajdari.
Sipas analistit, problemet e PD-së vijnë që nga koha e liderit historik të të djathtëve dhe se madje edhe vdekja e tij është një “histori të fortësh”, ku merren parasysh përplasjet partiake dhe ideore PD-PS.
Lubonja në analizën e tij nuk heziton ta cilësojë opozitën e sotme një fasadë, e cila sipas tij, me fjalë të tjera nuk bën gjë tjetër veçse i siguron Ramës opozitën që i nevoitet për të zhvilluar zgjedhjet.
Sipas Lubonjës, të thuash që Azem Hajderi ishte një idealist dhe vajza e tij erdhi me ideale është të mashtrosh. Ai shprehet se partia e re e krijuar nga Rudina Hajdari dhe Astrit Patozi është e dështuar që në nisje, duke mos patur mbështetjen e askujt por vetëm të pushtetit.
“Zonjës Hajdari i thonë e zgjodhën se është e bija e Azem Hajdarit, por për mua problemet e PD fillojnë që me Azem Hajdarin. Pse u vra Azem Hajdari? Për histori të fortësh. Ai u vra nga disa të fortë që ishin të lidhur me PS. Ai u vra sepse ishte tek ata që quhen të fortët e PD. Kjo analizë fillon që me të fortët. E kam dhe me oligarkinë por edhe me ata të fortët e zonave elektorale.
Të thuash që Azem Hajdari ishte një idealist dhe vajza erdhi si e tillë është të mashtrosh, është një problem i madh.
I ke dëgjuar këta të flasin njëherë për vjedhjen tek Astiri, për teatrin që po prishet, për kullat që do të ndërtojë Edi Rama?! I vetmi problem është demokracia në PD. Më fal po a kanë qenë këta në kohën e Berishës? Këta nuk përfaqësojnë dhe nuk sjellin asgjë në këto zgjedhje përveç se një shërbimi për Edi Ramën që të sjellë një fasadë, që ja ku e kemi opozitën. Nga pikëpamja pragmatiste nuk shkon, janë të dështuara. Këta duket që nuk kanë mbështetjen e askujt përveç se të pushtetit”, deklaroi Lubonja.
(B.L/FAXWEB)
