Krimet e Rënda caktojnë datën 19 qershor për seancën e parë ndaj ish-Ministrit të Brendshëm Saimir Tahirit, i cili akuzohet për “Grup të strukturuar kriminal”.
Kujtojmë që gjykata vendosi disa javë më parë “gjykim të shkurtuar” për ish-ministrin e Brendshëm, Saimir Tahiri. Pas vendimit të gjykatës ky i fundit doli në një deklaratë për mediat ku ju është përgjigjur edhe pyetjeve të gazetarëve.
Tahiri tha se, është e pakuptimtë zgjatja dhe zvarritja e hetimeve ndërkohë argumentoi se, gjykata nuk i është përgjigjur pyetjes së tij se për çfarë akuzohet dhe në cilin rast e ka shkelur ligjin.
“Nuk jam ndonjë hero i heshtur, por di të them që realisht më vjen keq për njerëzit që vuajnë nga ky sistem drejtësie dhe nuk flasin dot përpara jush. Ajo që keni dëgjuar. Unë i kërkova prokurorisë të bëjë një akuzë të saktë dhe të qartë. Prokuroria duhet të tregonte cilin veprim kam bërë unë që kam shkelur ligjin. Prokuroria nuk u përgjigj. Sot dhe tutje do të flas edhe unë. Në Gjykatë dhe për publikun. Nuk mund të jetë më një proces ku provat e ashtuquajtura trafikohen…Unë di t’ju them që ky proces i ka kapërcyer kufijtë e një maskarade.
Unë nuk mërzitem dhe nuk më shqetëson asgjë nga këto. Them që do t’ia dal! E dyshoj shumë fort që ky është sistemi i drejtësisë për të cilën unë luftova. Por gjithsesi mbetet për t’u parë. E gjitha është një absurditet. Unë i drejtohem Prokurorisë dhe Gjykatës të më thonë se ku kam shkelur ligjin dhe nuk më thonë asgjë”.
(B.K/FAXWEB.AL)
Discussion about this post