Krimi në Fier. Shoqata e gjyqtarëve: Nuk e ka fajin vetëm gjyqësori

Shoqata Kombëtare e gjyqtarëve ka reaguar lidhur me krimin në Fier, ku burri hodhi gruan nga dritarja e banjos.

Sipas shoqatës nuk mund t’i lihet faji vetëm gjyqësorit, pasi për dhunën në familje jemi të gjithë përgjegjës. Madje sipas tyre, mbi gjyqësorin po hidhet vazhdimisht baltë në mënyrë të padrejtë.

Gjyqtarët ngrejnë pyetjen “Pse policia nuk bëri punën e saj?”, duke ia hedhur kështu përgjegjësinë policisë.

Duhet theksuar se gjykata ka deklaruar se rreth një muaji më parë ka lëshuar një urdhër mbrojtjeje për Liljana Rukajn, ndërsa policia e rrethit të Fierit shprehet se ky urdhër nuk i ka mbërritur, ndaj edhe nuk është zbatuar.

Duke patur parasysh se klima mes pushtetit gjyqësor dhe atij politik paraqitet e tensionuar, shoqata në fjalë bën thirrje që pavarësia e gjykatave të mos cënohet nga funksionarët.

Përfaqësuesit e shoqatës ngrenë një çështje tjetër: “Pse nuk ngrihen streha sociale për të dhunuarit?!”, duke nënkuptuar se ka edhe mënyra të tjera, jashtë gjyqësorit, për t’i dhënë zgjidhje këtij problemi.