Krimi në Shënavlash/ Ndihmoi Esmerald Ballën të hedh trupin e pajetë të të atit në pus, kush është 25-vjeçari i arrestuar (Emri)

Edison Brahaj është 25-vjeçari i arrestuar si bashkëpunëtor në krimin e ndodhur në Shënavlash të Durrësit, ku 30-vjeçari Esmerald Balla vrau me armë zjarri të atin, Enver Balla dhe më pas trupin e tij të pajetë e hodhi në pus.

Sipas uniformave blu, Edison Brahaj ka ndihmuar 30-vjeçarin për të transportuar trupin e pajetë të viktimës, Enver Balla, duke e hedhur në një pus. Raportohet se 25-vjeçari, i cili kishte lidhje shoqërore me autorin e krimit, dyshohet se ka bashkëpunuar me të në transportimin me automjet të trupit të viktimës nga vendi i ngjarjes deri te pusi ku kufoma u gjet nga policia.

Ndaj tij u ngritën për veprat penale “Moskallëzim i krimit”, “Veprime që pengojnë zbulimin e së vërtetës” dhe “Fshehja ose asgjësimi i kufomës”. Ndërsa gjatë kontrollit e 25-vkeçarit u gjet dhe u sekuestrua një shumë prej 145 000 lekësh.

Njoftimi i policisë:

Durrës

Vijojnë veprimet hetimore për zbardhjen dhe dokumentimin e plotë ligjor të vrasjes së 62-vjeçarit.

Vihet në pranga shtetasi që ndihmoi autorin e vrasjes së babait të tij, në fshatin Shënavlash, për të transportuar trupin e pajetë duke e hedhur në një pus.

Në vijim të veprimeve hetimore të pandërprera, lidhur me ngjarjen e ndodhur në fshatin Shënavlash, ku djali vrau me armë zjarri babain e tij dhe e deklaroi të larguar nga banesa, duke pretenduar se kishte humbur kontaktet me të, veprimet janë intensifikuar dhe si rezultat është bërë i mundur identifikimi, kapja dhe arrestimi i bashkëpuntorit të tij, shtetasit E. B., 25 vjeç, banues në Sektor Rinia, Durrës.

Ky shtetas, i cili kishte lidhje shoqërore me autorin E. B., dyshohet se ka bashkëpunuar me të në transportimin me automjet të trupit të viktimës nga vendi i ngjarjes deri te vendi ku u gjet nga policia.

Gjatë kontrollit në banesën e E. B., u gjet dhe u sekuestrua një shumë prej 145 000 lekësh.

Për sa më sipër, ky shtetas u arrestua për veprat penale “Moskallëzim i krimit”, “Veprime që pengojnë zbulimin e së vërtetës” dhe “Fshehja ose asgjësimi i kufomës”. Vijojnë hetimet e thelluara për zbardhjen e plotë të kësaj ngjarjeje. Materialet procedurale i kaluan Prokurorisë për veprime të mëtejshme.