Në një lidhje të drejtpërdrejtë për Fax News, aktivisti Sadri Kortoçi ka reaguar me tone të forta kundër zhvillimeve të fundit në zonën e Thethit, duke e quajtur situatën “një tradhti ndaj trashëgimisë kombëtare”.
“Kjo është zi kombëtare,” tha Kortoçi, duke shtuar se as okupatorët nuk kanë guxuar të shkatërrojnë me këtë intensitet siç po ndodh sot në emër të shtetit.
Sipas tij, Edi Rama ka kryer një krim ndaj Thethit, duke e quajtur kreun e qeverisë “kriminel i veshur me pushtet”.
“As serbi nuk e ka bërë këtë gjë në Kosovë,” deklaroi Kortoçi, duke denoncuar ndërhyrjen në një zonë të mbrojtur me vlera të larta natyrore dhe historike. Ai theksoi se shteti shqiptar ka lejuar ndërtimet pa kriter, duke vënë në pikëpyetje funksionin e ligjit dhe institucioneve.
Në një tjetër deklaratë të fortë, Kortoçi tha se nuk ka parë reagim nga komuniteti shqiptar, çka sipas tij përbën një alarm të madh për ndërgjegjen kombëtare.
Ai e konsideroi të gjithë këtë situatë si një përpjekje për poshtërimin e Thethit, duke shprehur shqetësim edhe për të ashtuquajturën “Paketa e Maleve” – një plan i qeverisë për zhvillimin e zonave malore që sipas tij është i errët dhe i paqartë për publikun.
“Atë që po bën Rama nuk e kanë bërë pushtuesit,” përfundoi Kortoçi, duke kërkuar mobilizim qytetar dhe përgjegjësi politike për dëmet e shkaktuara në këtë zonë të trashëgimisë natyrore shqiptare.
