Miliarderi i teknologjisë, Elon Musk, ka kritikuar hapur një projektligj të rëndësishëm të mbështetur nga Presidenti i SHBA-së, Donald Trump, i miratuar javën e kaluar nga republikanët në Dhomën e Përfaqësuesve.
Në një intervistë për programin “CBS Sunday Morning”, Musk shprehu shqetësim për ndikimin fiskal të ligjit të ri dhe efektin e tij në Departamentin e Efikasitetit të Qeverisë (DOGE), një institucion i krijuar enkas nga Trump për të zvogëluar shpenzimet federale.
“Sinqerisht, u zhgënjeva kur pashë projektligjin e shpenzimeve. Jo vetëm që nuk ul deficitin buxhetor, por e rrit atë në mënyrë të ndjeshme dhe minon përpjekjet e ekipit të DOGE,” tha Musk.
Projektligji i miratuar, i quajtur “One Big Beautiful Bill”, përfshin zgjatjen e shkurtimeve të taksave të miratuara gjatë mandatit të parë të Trump më 2017, vendos kërkesa më të rrepta pune për përfituesit e Medicaid, rrit financimin për sigurinë kufitare dhe eliminon një sërë kredish tatimore për energjinë e pastër.
Sipas Zyrës së Buxhetit të Kongresit, ky ligj pritet të shtojë 3.8 trilionë dollarë në deficitin federal deri në vitin 2034.
Duke iu referuar emërtimit të projektligjit Trump tah me ironi: “Një projektligj mund të jetë i madh ose mund të jetë i bukur. Nuk jam i sigurt që mund të jetë të dyja njëherësh”.
Edhe pse ligji ende nuk është votuar në Senat, komentet e Musk sinjalizojnë një krisje politike mes tij dhe Presidentit Trump.
Vërejtjet e tij mund të ndikojnë debatin rreth projektligjit, sidomos mes republikanëve dhe konservatorëve tradicionalë që janë të shqetësuar për borxhin federal.
