Presidenti i Shqipërisë, Ilir Meta i pranishëm sot në Skrapar ka folur për krizën e thellë politike që ka ‘pushtuar’ vendin dhe po ndikon në ekonomi dhe në fushën e turizmit. Meta thekson se duhet të ndërhyet urgjentisht që kriza të mos thellohet më tej.
Përmes një postimi në rrjetet sociale Meta uron një sezon të mbarë dhe të suksesshëm turistik, duke folur me bindje për Skraparin si një destinacion të rëndësishëm turistik.
“Me urimin për një sezon të mbarë e të suksesshëm turistik, jam i bindur se Skrapari, falë atraksioneve të jashtëzakonshme që ofron, mikpritjen, traditat e kulinarinë e veçantë, shumë shpejt do të jetë një nga destinacionet më të rëndësishme turistike në të gjithë rajonin!
Por për fat të keq, kriza politike ku ndodhet vendi, po sjell pasoja tepër të rënda edhe në ekonomi. Efektet e para kanë filluar të ndihen në turizëm dhe operatorët e cilësojnë situatën dramatike.
Edhe për këtë arsye ia vlen të reflektohet urgjentisht, përndryshe do të goditet rëndë turizmi dhe gjithë familjet shqiptare që mbështesin mirëqenien e tyre në këtë sektor kyç të ekonomisë tone.”, shkuran Meta në Facebook.
