Guvernatori i Bankës së Shqipërisë, Gent Sejko, është shprehur lidhur me krizën politike në vend dhe ndikimin e saj në ekonominë shqiptare. Ai ka treguar se Banka e Shqipërisë po mban në monitorim parametrat makro-ekonomikë për të parë ndikimet që mund të ketë.
Ai u shpreh për “Ora News” se aktualisht nuk konstatohet shmangie thelbësore, megjithatë çdo tejzgjatje e saj do të reflektonte në klimën ekonomike të vendit.
“Ne normalisht do të shikojmë zhvillimet e mëtejshme por në parim në rast se ka zgjatje të tensionit politik natyrisht që kjo do të mund të ndikonte në nivelin e investimeve dhe iniciativave. Kryesisht në besimin për konsumatorin dhe në besimin për investimet e kryera. Nuk jemi në një moment që mund të them një shifër të saktë pasi ne po monitorojmë situatën dhe po shikojmë ndikimin që mund të ketë situata politike.
Aktualisht ne nuk kemi ndryshime apo shmangie nga parametrat makro-ekonomikë që ne monitorojmë. Pra në nivelin e kreditimit, rritjes ekonomike, gjithmonë duke ju referuar shifrave të tre mujorit të parë dhe shifrave të mëpasshme, BSH konstaton se nuk ka shmangie thelbësore. Nëse do ketë një tejzgjatje të tensionit politik natyrisht që kjo do të reflektohet në klimën ekonomike, ne do ta monitorjmë dhe do të publikojmë në raportet tona.”, është shprehur ai.
(XH.A/SHUPLAKA)
Discussion about this post