Të dielën pasdite Kroacia do të tentojë mrekullinë përballë Francës, për të çuar në shtëpi për herë të parë Kupën e Botës.
Pavarësisht lojës së mirë që kanë treguar, lodhja te kroatët është më e pranishme për shkak se kanë luajtur 3 ndeshje nga 120 minuta, duke sjellë dhe dëmtimin e disa lojtarëve.
Njëri prej atyre që rrezikon të humbasë finalen është edhe ylli i ekipit, Ivan Perisiç. Lojtari i Interit, që ka qenë një nga më të mirët e këtij turneu, pati një dëmtim në kofshë në takimin ndaj Anglisë.
Sulmuesi i krahut u dërgua në spital për ekzaminime më të hollësishme, pas një goditje në kofshë që mund ta lërë jashtë finales.
E gjithë Kroacia duket se po lutet që këmba e tij të rikuperohet në kohë. Perisiç ishte edhe protagonist në gjysmëfinalen ndaj Anglisë, ku pasi shënoi një gol dhe dha një asist, u shpall njeriu i ndeshjes.
(E.K/FAXWEB.AL)
