Kroçera “Seven Seas Voyager” me 687 turistë, mbërrin në portin e Durrësit

Mëngjesin e sotëm në portin e Durrësit është ankoruar kroçera “Seven Seas Voyager” me 687 udhëtarë në bord. Anija ka lundruar gjatë natës nga Argostoli (Greqi) drejt Durrësit, ndërsa pas qytetit tonë do të vijojë drejt Kotorrit (Mali i Zi).

Burime nga agjencia pritëse bëjnë të ditur se 472 nga udhëtarët e kroçerës janë nga SHBA, 57 nga Britania e Madhe, 37 të tjerë nga Australia dhe 32 nga Kanadaja.

Pjesa tjetër janë qytetarë nga 23 vende të botës, si Suedia, Katari, Hungaria, Hong Kongu, Luksemburgu, Hollanda, etj. Anija turistike me gjatësi 206 metra është ankoruar në kalatën 5 të portit, dhe do të qëndrojë në Durrës deri në orën 18.00.

Nga Qendra e Informacionit në APD, mësohet se nga 9 – 28 tetor në kalatat 4 dhe 5 do të ankorohen edhe kroçerat “Prinsedam”, “Ocean Majesty” dhe “Serenissima”, të fundit për vitin 2017. Kroçera “Ocean Majesty” do të lundrojë dy herë drejt Durrësit, më 13 dhe 28 tetor. Ndërkaq, bashkë me “Ocean Majesty” më 13 tetor do të mbërrijë në Durrës edhe kroçera “Serenissima”.

(E.K/SHUPLAKA)