Kryetari i Bashkisë së Fierit, Armando Subashi, do t’i duhet të përballet me Prokurorinë e këtij qyteti, kjo sepse Partia Demokratike e Fierit ka bërë kallëzim penal ndaj tij, për “abuzim me detyrën”.
Kryetari i PD-së në Fier, Luan Baçi, deklaron se bashkia e Fierit ka bërë prishje selektive në funksion të rikonstruksionit të bulevardit kryesor të qytetit.
“Kemi bërë kallëzim penal ndaj kryetarit të Bashkisë Fier, Subashi duke nisur nga shumë ankesa nga qytetarët tek dega e Partisë Demokratike Fier, por edhe si këshilltar të djathtë për punimet që bëhen në infrastrukturën në qytetin tonë dhe të fokusuar jemi tek prishjet selektive”, deklaron Baçi.
Mirëpo sipas Bashkisë, çdo prishje në zonë, është bërë sipas projektit urbanistik.
Ka qenë kreu i Inspektoriatit ndërtimor ai që ka sqaruar në emër të bashkisë, se cështja nuk është e mbyllur dhe mund të zgjidhet vetëm në gjykatë.
“Projekti që po realizohet për rehabilitimin e rrugës “Ramiz Aranitasi” është në zbatim dhe në këto kushte askush nuk mund të shprehet për prishje selektive kur ato ende nuk kanë përfunduar dhe janë në vazhdim. Konflikti personal mes komshinjve mund të zgjidhet në gjykatë dhe nuk mund të ndërhyjë bashkie”, tha kreu i Inspektoriatit ndërtimor.
(D.D/Shuplaka)
Discussion about this post