Kryetarja e LSI-së, Monika Kryemadhi ka pasur sot një mbledhje të hapur me gazetarët, ku u shpreh se shifrat e dhëna nga ministri i Financave Arben Ahmetaj, nuk pasqyrojnë realitetin e shqiptarëve.
Sipas saj 10% e shqiptarëve vuajnë mungesën e ushqimit, ndërsa për shkak të inflacionit vetëm në sektorin privat janë ulur pagat me 6.6% në për të gjithë punonjësit.
“Janë rritur ndjeshëm çmimet, pagat në sektorin privat janë ulur me 6.6%. Shqiptarët janë të bindur se kjo qeveri nuk i çon askund. 400 mijë shqiptarë janë larguar nga vendi për shkak të kushteve ekonomike që janë në vendin tonë.
Ministri Ahmetaj tha se investimet e huaja po rriten me 1000 investitorë të huaj, po nuk tha se pse janë mbyllur 13 mijë të tjerë. Sheratoni u largua për shkak të klimës së biznesit.
Nuk është se po vinë investitorë të rinj, ndërsa shqiptarët jetojnë në kushte ekstreme.
10% e shqiptarëve kanë mungesë të ushqimit në familjet e tyre. 99% e shqiptarëve janë më të varfër sesa kanë qenë 4 vite më parë.
Mjafton që të pyesni çdo shqiptarë dhe do ta kuptoni kushtet e vështira ekonomike në të cilën ata jetojnë”, u shpreh Kryemadhi.
Duke iu referuar zgjedhjes së kryeprokurores Arta Marku, Kryemadhi tha se në Kushtetutë nuk parashikohet prokurori i përkohshëm.
Edhe vetë zonja Maku e pranoi gjatë ditës së djeshme se zgjedhja e saj është bërë jashtë kornizave kushtetuese. Në Kushtetutë nuk parashikohet Prokurori i Përkohshëm, parashikohet vetëm në rastet kur kryeprokurorit i ndërpritet mandati dhe jo i përfundon”, vijoi më tej Kryemadhi.
(E.K/FAXWEB)
Discussion about this post