Kryetarja e LSI-së, Monika Kryemadhi, zhvilloi sot një takim me të rinjtë e LRI-së në Jalë, nga ku foli edhe për situatën politike në vend.
Ndërsa ka folur për përvjetorin e 15 të kësaj force politike që është tani afër, Kryemadhi ka përmendur edhe rolin e partisë që drejton në jetën politike të vendit si dhe për angazhimin e vajzave.
“Unë gjithmonë kam qenë organizatore kampit. LSI është shtuar këtë vit vetëm me vajza dhe është një gjë e mirë se thonë që është bereqet. LSI hyri si një forcë politike që theu monopolin e dy partive të mëdha. Le të jetë kjo javë e kampit të Jalës java e hapjes së aktiviteteve për 15 vjetorin e LSI sepse me 6 shtator LSI bëhet 15 vjeç” , tha Kryemadhi.
Ajo foli edhe për sfidat që e presin forcën politike që drejton por edhe për sfidat që sipas saj ka kaluar deri më tani, Kryemadhi theksoi se sfidat ‘të forcojnë për të ecur përpara’.
“Historiku i LSI është një histori e cila shumë prej nesh kanë kaluar vitet më të bukura të jetës, kemi kaluar momentet tona më të rëndësishme, por kemi kaluar edhe sfidat më të vështira. Sfidat janë ato që të rrisin e të forcojnë për të ecur përpara. Jemi rrëzuar e jemi ngritur. Mos i merrni shumë seriozisht lojërat politike që bëjmë ne këtu. Mos i shihni për të qenë lider menjëherë, lider është ai që fal dashuri për grupin”.
Kryetarja e LSI-së e ka pranuar se kohët e fundit ka qenë një periudhë e vështirë për të gjitha subjektet politike dhe institucionet e vendit, por ka shtuar se ata që vuajnë më shumë janë shqiptarët.
“Këto ditë kanë qenë ditë të vështira për LSI, për PD, për opozitën, për qeverinë, institucionet. Por ta dini se më shumë po vuajnë shqiptarët. Ne dhe ju si të rinj keni përgjegjësi për të ndryshuar gjendjen. Kjo që po bëjmë është përballë krimit të organizuar ndërkombëtar. Sigurisht që sfida është shumë e vështirë, por forca, idealizmi juaj është shumë më i fortë sesa makutëria e qeverisjes sonë”, tha ndër të tjera gjatë fjalsë saj Monika Kryemadhi.
(F.GJ/FAXWEB.AL)
Discussion about this post