Kryeministri hungarez Viktor Orban do të takohet sot me Presidentin turk Rexhep Tajip Erdogan për të folur kryesisht për luftën në Ukrainë, në fazën e fundit të një “misioni” të deritanishëm të pafrytshëm për të ndërmjetësuar armëpushimin.
Udhëheqësit e dy vendeve anëtare të NATO-s do të diskutojnë “konfliktet në Ukrainë dhe Lindjen e Mesme”, tha zëdhënësi i qeverisë hungareze Zoltan Kovacs përmes X. Turqia ka zgjedhur neutralitetin midis Moskës dhe Kievit dhe nuk merr pjesë në sanksionet perëndimore kundër Rusisë.
Sa i përket Viktor Orbanit, ai po bën lojën e tij, duke shfytëzuar afërsinë e tij me Kremlinin, ndërkohë që është edhe anëtar i Bashkimit Evropian, të cilin e kryeson deri në fund të dhjetorit.
Në fillim të korrikut ai shkoi në Moskë, duke thënë se po kërkon një zgjidhje diplomatike të konfliktit pa u konsultuar me partnerët e tij.
Shefi i shtabit të Orban tha sot se kryeministri hungarez i ka propozuar Putinit armëpushim dhe shkëmbim të të burgosurve e luftës midis Rusisë dhe Ukrainës me rastin e Krishtlindjeve.
Ai shtoi se Hungaria dëshiron që armëpushimi të zgjasë përgjithmonë, “por tani propozimi është për ditët e Krishtlindjeve”. Kremlini gjithashtu njoftoi sot se Rusia mbështet plotësisht iniciativën e paqes të kryeministrit hungarez dhe shkëmbimin e të burgosurve që ai ka propozuar.
Orban i bëri propozimet në bisedën e tij telefonike me Putinin, tha zëdhënësi i Kremlinit Dmitry Peskov.
“Kryeministri hungarez Viktor Orbán, gjatë bisedës së djeshme telefonike me presidentin Putin, propozoi që në prag të Krishtlindjeve të bëhej një shkëmbim i madh i të burgosurve midis Rusisë dhe Ukrainës, si dhe shpallja e armëpushimit për Krishtlindje”, tha Peskov.
Discussion about this post