Viktor Orban, kryeministri i Hungarisë, e përshkroi valën e emigracionit në Evropë si një pushtim.
Në një intervistë për gazetën gjermane “Bild” të hënën ai tha: “Ne nuk i konsiderojmë këta njerëz si refugjatë myslimanë. Ne i konsiderojmë ata si pushtues myslimanë”.
Njerëzit nuk po”luftojnë për jetën e tyre”, por “kërkojnë një jetë më të mirë”. Refugjatët duhet të kishin kërkuar pranimin e tyre paraprakisht, por në vend të kësaj ata kishin shkelur në mënyrë të paligjshme kufirin”, tha kreu i qeverisë hungareze.
“Kjo nuk ishte një valë refugjatësh, ky ishte një pushtim”, tha Orban.
Ai deklaroi se nuk mund ta kuptojë kurrë “si në një vend si Gjermania, kaosi, anarkia dhe kalimi ilegal i kufijve mund të festohet si diçka e mirë”.
Qeveria e Orban refuzon të pranojë sistemin e kuotave për refugjatët të propozuar nga BE dhe për këtë çështje është vënë nën kritika.
Orban reagoi ashpër ndaj zërave kritikë rreth paraqitjes së tij në Seeon.
“Unë mendoj se ne meritojmë më shumë respekt,” tha ai. (M.Q/Faxweb)
