Kryeministri Edi Rama është nderuar me titullin “Komandant i Legjionit të Nderit” gjatë vizitës së tij më të fundit në Francë.
Ai udhëtoi një ditë më parë drejt Parisit, në kuadër të vizitës njëditore zyrtare, në të cilën u takua me zyrtarë të lartë. Kreu i Qeverisë shkruante një ditë më parë se ishte gjithnjë kënaqësi rikthimi në Paris.
“Shumë i nderuar që kam marrë titullin e Komandantit të Legjionit të Nderit nga Presidenti i Republikës Franceze! Faleminderit Francë!”, shkruan Rama në “Twitter”.
Ndërkaq, në një postim të disa minutave më pas në “Facebook”, ai shkruan edhe se kujt ia akordon këtë çmim:
“I prekur thellë nga nderimi i Presidentit të Republikës Franceze, që më akordoi titullin e lartë të Komandantit të Legjionit të Nderit!
Ky është një titull që i’a kushtoj Shqipërisë; gruas, nënës, fëmijëve dhe të gjithë bashkëpunëtorëve e mbështetësve, të njohur e të panjohur, brenda a jashtë vendit. Vetëm besimi e mbështetja e tyre, më kanë mundësuar të bëj çfarë kam mundur në gjithë këto vite përpjekjesh për të ndryshuar Tiranën, bërë Shqipërinë shtet me dinjitet dhe përmirësuar jetën e njerëzve të zakonshëm të këtij vendi.
Faleminderit Francë”
Rreth një vit më parë, në Maj të 2016-ës, ky çmim iu akordua edhe shkrimtarit shqiptar Ismail Kadare. Ai u nderua në një ceremoni në pallatin presidencial “Élysée” nga presidenti Francois Hollande. Në atë ceremoni ishte i pranishëm edhe kryeministri Edi Rama.
(XH.A/SHUPLAKA)
Très honoré d’avoir reçu les insignes de Commandeur de la Lègion d’honneur par le President de la Republique Française! Merci la France???? pic.twitter.com/bRbqMgfUgk
— Edi Rama (@ediramaal) March 29, 2017
