Kryetari i KLSH-së Bujar Leskaj, takoi ambasadoren e re të Gjermanisë në Shqipëri, Susanne Schutz.
Gjatë këtij takimi u diskutua lidhur me rolin e KLSH-së në luftën kundër korrupsionit.
Kryetari Leskaj i shprehu Ambasadores gjermane mirënjohjen për rolin dhe kontributin e vendit të saj në progresin e Shqipërisë gjatë gjithë këtyre viteve dhe veçanërisht për përkrahjen e veçantë të kancelares Merkel për reformën në drejtësi dhe për mbështetjen e Gjermanisë në procesin e integrimit të Shqipërisë në BE.
”Për ne e rëndësishme është të luftohet anti-kultura e pandëshkueshmërisë, e cila për fat të keq, është instaluar në vend. Nëse niveli i zbatimit të rekomandimeve tona për largimin nga puna të nëpunësve të mesëm të administratës sonë publike, të cilët kanë abuzuar me pronën dhe fondet publike, është relativisht i kënaqshëm, 60 për qind, ai për largimin nga puna të zyrtarëve të lartë është shumë i ulët, 20-25 për qind. Kjo step edhe Prokurorinë në ndjekjen e rasteve të denoncuara nga ne për këtë kategori drejtuesish të lartë.”-u shpreh Leskaj.
Ambasadorja gjermane Schütz theksoi se lufta kundër korrupsionit nënkupton që njerëzit që e prodhojnë atë duhet të mbahen përgjegjës si ligjërisht, ashtu edhe materialisht.
”Efektiviteti në luftën kundër korrupsionit është kushti kryesor dhe një nga përparësitë që ‘Bashkimi Evropian’ kërkon nga Shqipëria për të çelur bisedimet për hapjen e negociatave për anëtarësimin e vendit në BE”, u shpreh Schütz.
“Vendi ka nevojë për institucione të fuqishme, jo për politikanë të fuqishëm”, theksoi Ambasadorja e Gjermanisë. (M.D/SHUPLAKA)
