Kryetari i Gjykatës Kushtetuse Bashkim Dedja ka folur për Opinionin e Venecias dhe ligjin e shumë diskutuar të Vettingut. Sipas tij Opinioni i Venecias nuk ka mbërritur ende në Gjykatën Kushtetuese në mënyrë që kjo e fundit të bëjë rishqyrtimet e rastit.
Në një intervistë për ‘’Ora News’’ ai u shpreh se sot pritet të vijë Opinioni i Venecias në rrugë elektronike. Sipas tij të gjithë mendojnë se shkaktare e vonesave është Kushtetusja, por realisht kjo nuk është e vërtetë dhe vonesat janë shkaktuar për disa procedura të vetë Komisionit.
Ai e ka cilësuar ligjin si shumë të rëndësishëm, duke qenë i vetëdijshmë për reformimin që do ti bëhet drejtësisë.
‘’Vazhdimisht është sulmuar Gjykata Kushtetuese për zvarritje dhe vonesa në shqyrtimin e kësaj çështje, natyrisht që kjo është një çështje shumë e ndjeshme dhe e rëndësishme për reformën në drejtësi, është ligji bazë pas Kushtetutës që u hap rrugën të gjitha ligjeve të tjera për tu zbatuar në praktikë por dua të sqaroj opinionin se është shqyrtuar në një kohë rekord ky ligj nga Gjykata Kushtetuese. Kushtetuesja e ka shqyrtuar në kohë rekord.Kërkesa është regjistruar me datën 5 tetor në Gjykatën Kushtetuese, Kolegji ka vendosur me 14 tetor duke e kaluar çështjen për gjyq, ndërkohë që është marrë vendimi për ti dërguar Komisionit të Venecias me datë 25 tetor nga mbledhja e gjyqtarëve për ti kërkuar mendim dhe seanca gjyqsësore është bërë pa kaluar një muaj nga depozitimi i kërkesës’’, është shprehur ndër të tjera Dedja.
Ai ka thënë se mbi Kushtetuesen po tentohet gjithnjë të hidhet baltë. Madje ka thënë se janë kryer edhe presione.
‘’I bëj thirrje politikës, pushtetit, mediave, kushdoqoftë që të heqin dorë nga presione që i bëjnë Gjykatës Kushtetuese, sepse si gjithë të tjerët dhe gjyqtarët e Kushtetueses janë shtetas të këtij vendi, njëlloj si gjithë qytetarët e tyre, janë të përgjegjshëm për detyrën e tyre, do vendosim për më të mirën e asaj që kërkohet.Gjykata Kushtetuese i nënshtrohet Kushtetutës dhe do ta mbrojë atë sipas rregullave dhe ligjeve që janë në fuqi dhe Konventave Ndërkombëtare. Nuk ka presion të drejtëpërdrejtë por fakti se çdo ditë në media, shtyp, parlament, apo portale, thuhet se Gjykata qëllimisht po zvarrit reformën, është bllokuese e integrimit në BE, gjyqtarët janë të kësaj apo asaj natyre përfshi dhe deri tek jo kriminelë etj, ka një ligj që do ti sqarojë këto gjëra bashkë me strukturat mbështetëse.Secili do të përgjigjet për gjithçka ka bërë dhe gjithçka është, duke filluar nga gjyqtarët kushtetues deri tek gjyqtari dhe prokurori më i thjeshtë.Ai që ia ka bërë vendin, ai që do të ketë përgjegjësi, do ti nënshtrohet përgjegjësisë.Ai që ia ka bërë vendin të përgjigjet, të shkojë në ferr.Ai që është i ndershëm, që ka punuar me profesionalizëm dhe iu ka përshtuar detyrës së tij patjetër që duhet të vlerësohet’’, ka vazhduar ai.
