Pashkët Ortodokse do të mbahen pa lutje masive në kisha, dhe pa urime te njëri tjetri, për shkak të situatës së shkaktuar nga pandemia e Covid 19.
Përfaqësuesi i Kishës Ortodokse, Miron Çako, në një komunikim me “Pasdite me Xhaxhiun”, u shpreh se në këto ditë të pandemisë është forcuar marrëdhënia e njerëzve me Zotin.
Çako tha se të gjithë besimtarët e ndjejnë prezencën e Zotit, ndërsa shtoi se në ditët në vijim do të ketë ditë më të mira për të gjithë shqiptarët.
I ngacmuar nga gazetari Rezear Xhaxhiu, se ku ishte Zoti, në momentet që kanë vdekur mijëra njerëz në Itali apo Spanjë, Çako tha se ne nuk e dimë gjykimin që ka pasur Zoti për ta. Duke iu referuar moshës së tyre, Çako tha se për një pjesë vdekja mund të konsiderohet dhe si një fund i vuajtjeve.
“Në situata të vështira, Zoti nuk na lë asnjëherë vetëm, dhe në këto situata si në filma që jemi duke kaluar në këto momente. Kjo situatë e ka shtuar marrëdhënien tonë me Perëndinë, pasi njerëzit kur janë në nevojë, kërkojnë ndihmën e mbinatyrshme.
Jeta është si gruri, që një ditë piqet dhe korret, ndoshta Zoti u ka hequr vuajtjet shumë prej atyre që tashmë janë në Parajsë. Ne nuk e dimë nëse vdekja e tyre është e mirë apo e keqe.
Zoti po vepron në këtë katrahurë që ne i kemi bërë vetes dhe botës ku jetojmë. Në të ardhmen gjërat do të ndryshojnë për mirë, dhe ne do ta fitojmë lirinë, kujdes nuk mund të abuzojmë me jetën, pasi mëkati e prish qetësinë dhe jetën”, tha Çako.
Discussion about this post