Një kuriozitet njerëzor ky i të gjeturit se ku ndodhet flamuri që Ismail Qemali ka ngritur në Vlorë më 28 nëntor 1912. Sot në 104-vjetorin e Pavarësisë restauratori Frederik Stamati jep detaje rreth tij dhe rreth flamurit që ruhet në Muzeun Kombëtar.
‘’Shqipëria nuk e ka flamurin që ngriti Ismail Qemali në Vlorë më 28 nëntor 1912. Dhe asnjë flamur nga ajo datë. Ai që pretendohet të jetë ngritur në Elbasan bëhet i dyshimtë falë një shkrimi të bërë në të me anë të qendisjes.
Flamuri në foto është flamuri përkujtimor më afër asaj date. Kërkimet e vazhduara na çojnë në mendimin se është flamuri i përdorur në Tiranë, gjatë kremtimeve të një vjetorit të festimit të Pavarësisë. Ky flamur, sipas asaj që më ka treguar i ndjeri Abaz Dojaka, dikur ka qenë në teqen e Dedejve në Tiranë. Të gjitha kërkimet e mëvonëshme për të gjetur të dhëna më të hollësishme, nuk dhanë asnjë rezultat.
Në vitin 1981 e sollën në laborator për ta restauruar dhe vendosur në Muzeun Historik Kombëtar. Ishte në ekstrem i dëmtuar, fije-fije. Kjo kishte ardhur ngaqë flamuri i mëndafshtë ishte vendosur në një kornizë me xham dhe i ekspozuar në një vend ku e kapte dielli. Punova intensivisht me punonjesën e laboratorit Raimonda Nushi për ta restauruar. Vazhdon të ruhet shumë mirë i ekspozuar në muze.’’, shkruan Stamati këtë mëngjes.
