Akademiku Artan Fuga, profesor dhe ish-shef i Departamentit të Gazetarisë dhe Komunikimit në Fakultetin e Historisë dhe Filologjisë-UT, analizon renditjen e keqe që kompania britanike i bëri këtij universiteti.
”Çfarë ka ndodhur që raporti i akreditimit të Universitetit të Tiranës e rendit atë më keq se të gjithë të tjerët?”, pyet me të drejtë Fuga, renditje që ngriti shumë pikëpyetje, duke e vendosur këtë universitet pas atyre në rrethe, si Gjirokastra apo Shkodra.
”Universiteti I Tiranës: Në litar!
Çfarë ka ndodhur që raporti i akreditimit të Universitetit të Tiranës e rendit atë më keq se të gjithë të tjerët?
Kur kam mbrojtur qendrimin që ligja për arsim të lartë, kjo mbulesë arkaike e një arsimi të lartë në koma, do t’a zhysi edhe më keq se çfarë është kulturën universitare të rinisë dhe kombit, a nuk po na e jep provën vetë establishmenti që e gatoi këtë ligj duke bërë një vlerësim që e dëshmon atë?
Pas një kuadri ligjor që i merr frymën dhe prodhon kaos në universitetet publike, a nuk po na vjen edhe një raport që i sugjeron Universitetit të Tiranës të merret me anë të dorës së dytë, duke i humbur kohë dhe energji, duke mos e ndihmuar të rinovohet dhe modernizohet? Mos po e fusin edhe arsimin universitar publik në rrugën e venitjes si me radiotelevizionin publik? ”, shkruan sot Fuga.
Akademiku hedh dyshimet e tij lidhur me vlerësimin e kompanisë duke bërë 7 pyetje.
”Ku problemet e universitetit të Tiranës dhe të arsimit universitar, aq serioze, ku raporti i një grupi akreditimi që erdhi e iku si era me shi?
Cikël reagimesh për publikun e gjerë, për vendimmarrësit, në vëmendjen e respektueshme të kolegëve dhe studentëve të mi!
- Përse vlerësimi barazimtar, pa mbajtur parasysh tipologjitë e ndryshme të institucioneve universitare, nuk sjell kontribut pozitiv dhe është i gabuar?
- Kush i pengon universitetet publike të realizojnë standarde shumë të larta? Matësi e ka krijuar vetë realitetin që mat!
- Si të kemi një sistem matjeje të performancës universitare që të jetë i pavarur, i saktë, i drejtë, i rreptë? Përvoja ime me një pjesë të ekspertëve! Stereotipe dhe paragjykime!
- Si nuk mund të shkëputet ekspertiza e shkallës së realizimit të standardeve institucionale nga rezultatet konkrete të arsimit të lartë!
- Ngatërrimi i universiteteve publike duke i gjykuar me remineshenca gjykimesh mbi ish-universitetet shtetërore. Udha pa krye e disa sugjerimeve!
- Sfidat e vërteta të arsimit universitar shqiptar dhe një ekspertizë e ekspertëve! Reformë e shpejtë, rrënjësore, cilësore!
- Cilët janë disa që u nxituan të shpallin dhe po shpallin zhdukjen e arsimit të lartë publik. Përse bëhet kjo dhe përse nuk ka strategji të qartë zhvillimi për arsimin universitar shqiptar?” (V.G/SHUPLAKA)
