Skënderbeu ka ripërsëritur mbrëmë suksesin e verës së 2015-ës, kur u kualifikua në grupet e Ligës së Europës për herë të parë. Po përveç emocioneve për të gjithë tifozët kualifikimi shoqërohet dhe me mbushjen e arkës së klubit.
Tani që kualifikimi u arrit, klubi përfiton direkt shifrën e 2,6 milionë eurove nga UEFA. Kësaj shume do t’i bashkohen edhe 675 mijë eurot për kalimin e tre tureve, që do të thotë në total rreth 3.3 milionë euro.
Rregullorja e UEFA-s është e tillë që skuadrat, të cilat futen në grupe të Ligës së Europës, nuk do ta përfitojnë shumën prej 245 mijë eurosh për fazën “play-off”. Zyrtarisht në klub kanë konfirmuar se do të akordohen 200 mijë euro pas kualifikimit, një shumë e cila pritet t’u shpërndahet lojtarëve në ditët në vijim.
Ndërkaq, për klubin parashikohen edhe të ardhura të tjera nga pjesëmarrja në fazën në grupe të turneut, ku ka bonuse nga UEFA. Ajo akordon 360 mijë euro për çdo fitore dhe 120 mijë euro për çdo barazim. Këtyre shifrave do t’u shtohen edhe të ardhura nga shitja ndërkombëtare e të drejtës televizive sipas ndarjes me përqindje që bën UEFA, të cilat rriten në bazë të shikueshmërisë së kundërshtarëve.
(E.K/SHUPLAKA)
