Trajneri i Kukësit, Armando Cungu, në vigjilje të ndeshjes së nesërme me Luftëtarin, foli në konferencë për shtyp para mediave, ku analizoi ekipin e tij, por edhe gjirokastritët që do të ketë përballë.
Ndeshja me Luftëtarin – Duam vetëm fitore. Kudo hyjmë për fitore. Luftëtari mori një rezultat të mirë ndeshjen e fundit, por kjo nuk do të thotë se kanë dalë nga problematikat.
Sistemi i lojës, mungesa e Musollit –Mungesa e tij ndihet, pasi është shumë i rëndësishëm. I uroj fat me operimin. E presim të gjithë kur të kthehet.
Diçka e mirë kur nuk fillon vetëm sulmi? –Deri tani kanë shënuar sulmuesit dhe mbrojtësit, tani pres kontributin e mesfushorëve (qesh).
Ecuria e Kukësit – Nuk patëm rezultate të mira në fillim, kemi ngërç në finalizimin e aksioneve. Tri javët e fundit kemi qenë më mirë. Ekipi ka qenë në rritje.
Kreu i klasifikimit – Dëshira ynë është mjaft e madhe, edhe mundësitë i kemi reale. Nuk më interesojnë shumë se çfarë bëjnë kundërshtarët, tani mendojmë vetëm për ndeshjen e radhës.
A mund të kalojë ekipi në eufori pas tri fitoresh? – I ndodh çdo ekipi. Kam kërkuar gjithmonë seriozitet, nuk kam shprehur ndonjëherë kënaqësi për pikët e marra. Nëse synojmë titullin, nuk kemi pse i gëzohemi pikëve. Në vetëkënaqësi shkojnë vetëm lojtarët, apo trajnerët amatorë. Në profesionalizëm nuk ka vetëkënaqësi.
Nga Shkodra në Elbasan – Tani u mësuam, jemi përgatitur që ky sezon do të jetë jashtë shtëpisë. Kudo që do të gjejmë një derë të hapur, do të luajmë.
Discussion about this post