”Kundërshtarët e kryetarëve ngelen pa tekst. Veçanërisht pa fjalë janë analistët e gazetarët e palëve”

Ish-ministri i Drejtësisë Ylli Manjani ka reaguar në lidhje me arritjen e marrëveshjes mes palëve politike.

Sipas tij kjo situatë krijoi precedentin e dorëzimit të ministrive të rëndësishme para zgjedhjeve. Po ashtu ai thotë se kjo marrëveshje largon nga skena politike Partitë e Vogla.

Kujtojmë se në marrëveshje nuk është e parashikuar që të ketë afate të reja për hyrjen e partive në zgjedhje si koalicione.

Pasojat..

Kjo marrëveshje e domosdoshme për zgjedhjet, krijoi disa efekte anësore:

1. Vendosi një precedent, dorëzimin e ministrive të rëndësishme para zgjedhjeve.
2. Largon nga skena politike partitë e vogla (të paktën në këto zgjedhje).
3. Dëmtoi iluzionin e aleancave politike strategjike . Me aleatin që fiton zgjedhjet ndan shumë më pak sesa me kundërshtarin ( LSI si aleate ka vetëm 4 ministra, PD si kundërshtare ka 6 plus zv. Kryeministrin).
4. Konfirmoi edhe njëherë se problemet politike nuk zgjidhen dot me gjyqe! Kolegji u çlirua nga presioni politik.
5. Kundërshtarët e kryetarëve ngelen pa tekst. Veçanërisht pa fjalë janë analistët e gazetarët e palëve.
6. Nxorri jashtë loje komplet, po komplet fare letrën e hapur të Hahn! Muri i BE me Shqipërinë është edhe më i madh.
7. Krijon një premisë reale për bashkëqeverisje PS-PD sipas modelit gjerman.
8. Opozitarizmi mund të marrë goditje.

Askush nuk duhet të pezmatohet nga kjo marrëveshje! Të paktën deri në përfundimin e zgjedhjeve.

Të gjithë po e kërkonim me ngulm!

Të shpresojmë në më të mirën! (E.K/SHUPLAKA)