Duhen fiks momente si këto që të nxjerrin zbuluar median, kryesisht portalet në Shqipëri. Deputetja Jozefina Topalli kishte zbukuruar vezët për Pashkë, me disa gurë dekorativë, të cilët jam e bindur se në çdo dyqan aksesorësh gjenden fare lehtë, por që media me ”shkopin e saj magjik”, i shndërroi menjëherë në diamantë.
Sa bukur! Alamet shkrimi(!) Klikimet po na vërshojnë (!) ”Deputetja shqiptare zbukuron vezët e pashkëve me diamantë”, një titull goxha i goditur në ditë si këto kur ke pak informacion, kur si media zmadhon ngjarje aspak të vërteta, e kur për më tepër ajo që i ka zbukuruar bën pjesë në grupin e deputetëve që qëndrojnë prej më shumë se 55 ditësh në një çadër para Kryeministrisë.
Të jetë e mirëmenduar? Të jetë pasojë e stafeve të redaksive që as e mendojnë dy herë atë që shkruajnë apo kështu ndodh zakonisht, kemi edhe ne mediet fajet tona?!
Por kjo po ndodh pak si shpesh! A nuk ju kujtohet se çfarë ndodhi me darkën e famshme te Pazari i Ri, kur disa medie e ”vulosën” koalicionin PS-LSI, disa u treguan të kujdesshme padyshim, e disa të tjera nisën të shpikin detaje e detaje, të cilat brenda orësh u hodhën poshtë.
Është kthyer në një sistem ”shpikja”, ”manipulimi me faktet”, stërhollimi i historisë sipas qëllimit, deri sa arrijmë në idiotësi të tilla të tipit: deputetja ka aq shumë diamantë, sa zbukuron edhe vezët (!)
Dhe janë lajme shumë të rëndësishme për të kuptuar se si funksionon: kapja e indicies, hulumtimi, mbledhja e fakteve, verifikimi, futja e burimeve, versionet e të prekurve e deri te publikimi.
Por mediet vazhdojnë të jenë në sferën e tyre të xhamtë, vazhdojnë të mendojnë se mund t’ia hedhin publikut, aq sa nuk e kuptojnë se është kjo audiencë që i ka braktisur prej kohësh pikërisht për shkak të këtyre idiotësive! Doni një shembull ”fake news”-i që shitet si diçka ”e lehtë”, si për festë, ashtu padashje, ja ku e keni, këtë të sotmin.
Një ngjarje kaq e thjeshtë, pa ndonjë interes të madh publik, përveç kuriozitetit dhe raportohet pa pikë verifikimi, në këtë formë. Po me ngjarjet me peshë e imagjinoni ç’ndodh brenda ”laboratorëve” që kanë në dorë ”shkopin magjik”, që gurët dekorativë i shndërrojnë shpejt e shpejt në diamantë?! Valmora Gogo/SHUPLAKA
Në galeri keni fotot e deputetes Topalli dhe gurët që disa syresh i shohin si diamantë
[ngg_images source=”galleries” container_ids=”1591″ display_type=”photocrati-nextgen_basic_imagebrowser” ajax_pagination=”1″ order_by=”sortorder” order_direction=”ASC” returns=”included” maximum_entity_count=”500″]
