Barcelona mposhti me rezultatin 1-0 Levanten në “Camp Nou”, duke nisur kështu festën e titullit para tifozërisë që ishte e shumtë në numër, në shkallët e stadiumit.
Tashmë Katalanasit renditen mbi të tjerat këtë sezon, duke fituar titullin e dytë radhazi dhe të 26-in në historinë e kampionatit spanjoll.
Lideri i ekipit, Lionel Messi ishte futbollisti që shënoi golin 3-pikësh, me vlerën e titullit kampion mbrëmjen e sotme, teksa u aktivizua në pjesën e dytë duke shënuar në minutën e 62-të.
Kujtojmë se argjentinasi ka pasur një sezon të jashtëzakonshëm, pasi ka shënuar 34 gola dhe ka asistuar 13 të tjerë, kur kanë mbetur edhe 3 javë nga fundin ende.
Tashmë katalanët do të përqendrohen në Ligën e Kampionëve, ku në mesjavë do të përballen me Liverpoolin, në sfidën e parë gjysmëfinale.
Barcelona ruan shanset për të bërë tripletë trofesh, pasi ka siguruar edhe finalen e Kupës së Mbretit, ku do të diskutojë trofeun me Valencian në finalen e 25 Majit.
